如JoeJunior在無綫劇《天與地》金句：「Thiscityisdying!」小圈子特首選舉投票昨日終塵埃落定，梁振英當選新一屆特首。張敬軒昨怒斥特首選舉馬虎、荒誕、兒戲，白韻談結果時更激動落淚，憂梁振英獨裁，更怕他變成香港版普京（俄羅斯候任總統），白姐姐揚言將與全港市民一起努力爭取2017年普選，為自由、為民主而搏鬥。
全城關注的特首選舉昨日終有結果，梁振英以689票KO僅獲285票的唐英年成為新特首。對於梁振英當選，現任區議員白韻琹昨在電話中得知結果後，忍不住哭了出來，她在電話中哭着說：「喊係因為擔心同感觸，我好唔滿意！因為我信唐唐講23條同商台嗰件事，以後唔知佢（梁振英）會做啲乜，佢會好獨裁，我唔明點解得百分之三十幾民望嘅人會當選，佢民望仲低過曾蔭權，嗰600幾人就係選咗個咁嘅特首出嚟，所以我好想今次流選，等中央政府畀我哋5月做全民普選！」
白姐姐強調香港人很文明、自由、愛民主，即使有不滿，也只是和平上街表達意見，亦不是盲從講民主，白姐姐說：「你睇就算何俊仁係民主黨嘅特首候選人，香港人都唔一定選佢。」
「怕佢變成香港普京」
如此不滿梁振英，會否考慮移民？白姐姐謂她當選區議員後已放棄了兩個外國國籍，但若非如此也不會考慮移民，她說：「我更加要留低喺度爭取自由民主，頭先睇到梁振英話想連任下一屆特首，我真係好驚呀！怕佢會變成香港普京，佢做咗特首之後會自己設門檻，普京都係咁益自己，越嚟越獨裁，我怕佢一代代做落去。」白姐姐慨嘆整個特首選舉都烏煙瘴氣，根本贏家、輸家全都輸清光。
張敬軒前日在全民投票中投了白票，對於昨日梁振英當選，軒仔昨在微博怒斥說：「一場應該很嚴肅、很謹慎、很具代表性的選舉就這樣馬虎、荒誕、兒戲地結束了。我不是政治家，我不知道今天如果流選，接下來的程序應該如何，又或者再有何人參選。昨天，我和121,580人一樣，憑着良心投下白票。我們當然知道人誰無過，但這漫天的黑材料和疑幻似真的種種傳言，實在無法讓老百姓投下放心一票。」
Kelly：希望實現雙普選
今次特首選舉被視為小圈子選舉，全港市民均期望爭取2017年雙普選，一人一票選出心中特首人選，就連剛生完第二胎的陳慧琳（Kelly）也不例外，Kelly昨日接受電話訪問說：「邊個做特首都好，只希望能保持社會和諧穩定，到2017年可以真正實現雙普選，市民可以自己選心目中嘅理想特首人選。」
被指貌似唐英年太太郭妤淺的阮小儀，昨日與森美錄影無綫節目《千奇百趣高B班》時，指昨日特首選舉如睇球賽，小儀說：「邊個做特首都好，希望五年內搞好香港。」對於梁振英打壓商台，小儀說：「我哋都驚冇咗份工，好在有TVB，我咪騎牆囉！」可有說話安慰唐唐？小儀說：「佢參加得就預咗有贏有輸，相信佢有心理準備。」對梁振英可有期望？小儀說：「希望唔好交稅太多，買樓有津貼或者平番啲。」森美則慨歎唐唐落敗後少了樂趣，他說：「佢帶畀香港好多歡樂，冇咗佢政治好沉悶，冇晒地下皇宮、私生子、神秘梳化。」
選委阿倫：受得起壓力
對於梁振英打壓商台，森美說：「希望唔好畀唐唐講中佢，我唔相信佢有咁講過。」
代表演藝界的選委譚詠麟（阿倫）昨日在旺角出席新碟簽名會，他未有透露投選哪位候選人，對有選委受壓轉投梁振英一事，阿倫說：「從來冇人討論過，冇人打畀我，亦冇受任何壓力，就算受壓力我都受得起，我唱歌都面對10萬人。」校長表示心目中早有決定，他說：「家唔講，都決定咗，大家都唔好猜測。」阿倫又乘機宣傳新碟說：「未來香港係需要《一點光》同正能量。」阿倫對新任特首抱觀望態度，他說：「選咗唔係唔使做，傳媒有監察力，咁天跌乜嘢嘢食落嚟都要擘大口，自己要付出，家要時間觀察，好多嘢要落實要執行，唔好議而不決。」
採訪、攝影：林妃、卓寶花、楊潔雯、仇志德