曾幾何時，投資銀行係繼醫生同律師後，最受大學生歡迎嘅職業，不過經過雷曼爆煲同歐債危機，投行不斷裁員，又減薪又cut花紅，難怪摩根士丹利董事總經理季衞東（Richard）都話，近年做ibank好似拍悲情劇，喺內地做互聯網前景仲好！
內地公司利潤率35%
復旦同哈佛出身嘅Richard噚日開講座，同大學生及校友大談中國互聯網前景，佢話前排最熱門話題，就係講內銀賺錢賺到手軟，但講到暴利，內銀股甚至內房股都唔及IT股咁筍，「統計內地近40間互聯網上市公司，平均利潤率達35%，這些公司不受調控及貨幣政策影響，人工成本亦只佔美國同行20%，這生意比做投資銀行更好！」
Richard又講笑話，做投行好似三文治，夾喺投資者同企業中間，天氣（市況）好就趕住出去耕作，天氣差就冇收穫，仲「勸籲」同學入行前要「考慮」清楚咁講。