【本報訊】近期港股忽上忽落，內地民企更接連出事，有沒有一些「買咗瞓得着」的股份可以「避下風頭呢」？花旗亞太區證券研究董事總經理劉顯達認為，他所研究的類別中，內地燃氣股屬可「長揸」的股份，因為有增長之餘，亦不會「大上大落」。
記者：陳健文、陳韻妍
劉顯達說：「我喜歡呢個sector（板塊）嘅原因好簡單，就係有增長！中國經已講到明要陸續增加天然氣佔總能源嘅使用比重，由現在大約5%增加到2015年時嘅8%，即係每年有20%增長，呢個增幅喺其他sector係搵唔到嘅。」
他續稱：「好似發電企業咁，舊年年底炒完一輪加電費，炒貴咗，大家年初又轉去買電力設備股，之後又轉去核電概念，結果好多家都係打回原形，係燃氣股先可以揸長啲……特別啱個啲無乜時間睇住嘅投資者。」
兩電一煤 乏增長空間
同樣派息穩定的「兩電一煤」比較又怎樣呢？劉顯達表示，中電（002）、電能實業（006）及煤氣（003）確實是派息穩定，於股市大幅波動下是一個理想的「資金避風塘」，惟相對內地燃氣股，則缺乏增長空間。
內地燃氣有增長之餘又相對穩定，但又不至於全無風險吧？
劉顯達承認燃氣股也是有風險的，其中政策改變可算是最大的風險。他說：「就好似加價咁，次次都係加咗上游供氣價先，之後管道燃氣經營商先加返，又或者係加幅唔可以完全抵銷來氣加幅，完全由政策決定，同市場無關……但我認為呢個風險可以接受。」
現時距離飽和仍很遠
對於有市場人士指出，內地燃氣市場急速發展了超過10年，現已進入要相互併購的飽和階段，故近年內地燃氣市場亦多番出現併購的活動。但劉顯達對此說法並不認同，倒認為現時市場仍離飽和很遠。
劉顯達又表示：「按內地嘅標準，人口超過20萬人嘅就可以稱為城市，而咁樣嘅城市中國就有660萬個，但查實家各大燃氣企業用咗10年，都只係攞咗好少部份嘅城市，仲有好多未有人簽到，部份原因係西氣東輸未去到，所以增長空間仲係好大。」
他倒認為，近年內地燃氣企業發展步伐放慢，純粹是因為各地政府「叫價」太高。
「10年前就算係一啲優質項目，由於係各自各咁傾，叫價亦只係1倍至1倍多啲嘅市賬率，但由於大家喺度猛搶，政府先知道原來啲項目係咁值錢喎，咪改咗用競投方式嚟賣，結果就搞到個價去到成2、3倍市賬率，咁大家咪慢晒囉……咁企業咪惟有用收購嚟擴張，平啲嘛。」劉顯達說。
劉顯達履歷
1994
港大取得工商管理學位，主修會計及財務。畢業後於香港管理專業協會任銀行業課程講師
1996至2000
成為株式會社第一勸業銀行金融項目經理
2000至2003
加入野村證券，開始研究公用股
2003至2005
跳槽至荷銀，成為該行亞洲公用及基建研究部主管
2006至今
花旗亞太區證券研究董事總經理