大肚婆禁忌多多，但娛樂圈的潮媽懶理禁忌，前晚懷有近四個月龍B的文頌嫻，為了貪靚穿着四吋高斗零踭出席婚宴；而婚後減產的麥家琪，宣佈將誕第三胎，目前已懷有六個幾月大的小龍女，老公贈大屋獎勵，她百無禁忌連日不停搬屋。
前晚洪天明與周家蔚婚宴星光熠熠，大肚婆多籮籮，懷有近四個月身孕的文頌嫻前晚因為貪靚竟不顧禁忌，穿着四吋斗零踭出席婚宴，還玩到凌晨12時才捨得與姚樂怡一齊離開。
追女成功
而93年落選港姐麥家琪下嫁大律師王國豪，現育有分別四歲的Johan和兩歲的Enoch，榮升媽媽後麥家琪開始減產，前晚家琪腹大便便現身天明與家蔚婚宴，宣佈正懷有六個多月身孕，她一直希望追女，去年終於如願以償，王家小龍女將於兩個幾月後出世。老公王國豪為獎勵家琪，最近買了一間大屋送給她。
不過，家琪同另一位龍媽文頌嫻一樣，都不理會大肚婆禁忌，近日不停搬屋，昨日家琪在電話幸福地說：「老公話生咗BB後，想我居住環境好啲嘛。」
生完封肚
麥家琪表示現在重了30磅，胃口很好，她揚言生埋小龍女後封肚，她開心說：「兩個哥哥都知妹妹喺我肚入面，二仔成日錫我肚皮話錫妹妹，好sweet。」打算順產定剖腹？她表示：「呢胎想剖腹，但醫生唔准，話我之前兩胎都順產，如果自己可以盡量唔好要捱一刀。」懷第三胎，辛不辛苦？她語氣輕鬆：「唔辛苦，對我嚟講生仔唔係難事。」
王國豪為感激家琪為他生三個仔女，充滿喜悅在電話中發表愛的宣言：「好開心，以後賺錢畀晒老婆，財政大權喺晒佢手。」
採訪：比華利、彭琮然
攝影：羅德光