上星期四總裁W在賽馬車會請食飯，講上年業績，業績好好吖，營業額、純利、每股盈利、末期股息等等都有雙位數字增長，股東應該感到滿意，但業績一宣佈之後，股價就跌，左丁山問點解，總裁W雙手一攤，表示不明所以。一句話講晒，好消息出貨啦，待各分析師消化晒業績數字，再出研究報告之後，股價先至會再度上升，年前已有大行作出初步目標價為四元。
CNBC在六月二十一日有一份有趣報告：指今年一月至今之杜指、標普500之升浪，動力來自散戶，不少基金、大戶其實在去年底就謹慎、睇淡，不願大舉入市，故此標普今年雖然狂升12%，但每日成交額比去年平均顯著降低，到依家，華爾街專家紛紛睇好嘞，但散戶就認為大戶唱好，夠鐘獲利離場咯，啲散戶真係咁醒，與大戶玩捉迷藏，不做大戶點心？不宜過早下定論。
依家股市中午收市，只有一小時，故此飯局在中午十二時開始，人齊立即開飯，一點過後，股評人陸續離開，賽馬車會以蒸魚、叉燒、炸子雞馳名中環，夥計將就時間，上桌似快餐店，炸子雞與鎮江骨打孖上，味道雖然可口，但食起來有壓迫感，認真冇氣氛咯。冇辦法啦，證券界人士冇時間「嘆」飯，唯有擒擒青食完就算。總裁Ｗ亦好識做，講業績不長篇大論，派完幾頁報告，講幾句就等大家發問，充分發揮中環效率。記得上星期一中午時到達陸羽，發覺有好多吉位，問吓夥計，佢話：「無咗好多經紀，佢地根本冇時間嘆茶，一點鐘前就走晒咯，有啲索性唔出嚟食㖭，留在公司食飯盒。」唔，他日港交所完全與倫敦紐約看齊之後，根本取消午飯時間，中環食肆又有一番變化。
吃飯擒擒青，上市公司之IR及證券商/分析師吃午飯講業績，難度日增。我地本應講多啲3G、4G、newiPad嘅，但行政長官選舉在即，到咗飯局下半段，我地就改為講特首會是誰，如何迎接新時代，估計股市會暫時睇高「梁籌股」一皮，但甚麼股是「梁籌股」？研究吓先！