梅姆巴喺英足盃8強休克後，保頓將上周中對阿士東維拉嘅聯賽延期舉行，所以上星期六主場對布力般流浪，係梅姆巴出事後保頓嘅首場比賽。
為咗支持梅姆巴，保頓球迷賽前喺看台用紅、藍、白色嘅紙砌出「Muamba6」（上圖），6號係佢嘅球衣號碼。講番場比賽，保頓靠日本翼鋒宮市亮兩次助攻畀中堅韋達入波，以2:1擊敗布力般流浪，贏出護級大戰，暫時排尾4。保頓領隊高尼賽後話，喺賽前嘅球隊會議，佢都唔使講太多嘢；因為梅姆巴託人帶咗個口訊嚟，叫班隊友加油，成隊即刻士氣高昂，個個都想送場勝仗畀梅姆巴。另外，保頓仲好有人情味，話絕對唔會趁梅姆巴病就踢走佢，仲話佢想留隊嘅話，留幾耐都得㖭！