香港選特首，鬥生鬥死鬥足幾個月，星期日終於落幕；西甲方面，皇家馬德里同巴塞隆拿，以及基斯坦奴朗拿度（C朗）同美斯嘅大鬥法，就仲未有結果。上周六兩人齊齊入球兼破紀錄，領球隊全取3分；其中C朗更加成為西甲最快累積100個入球嘅球員㖭！
C朗入兩球 皇馬大炒5:1
皇馬主場對皇家蘇斯達，有教練摩連奴、奧斯爾同比比停賽，但班球星都好生性；希古恩先開紀錄，加上C朗同賓施馬梅開二度，以5:1輕取皇蘇，終止兩連和頹勢，叫做拉番開巴塞6分。
皇馬最威風就梗係C朗啦，連入兩球後，個人西甲總入球突破100大關，累積到101球；而且只係踢咗92場就過百，比皇馬名宿普斯卡斯原本105場嘅舊紀錄，足足快成13場，比死敵美斯嘅154場，足足快62場㖭！不過，因為不滿上仗對維拉利爾時，球證嘅執法，摩連奴同助教卡蘭卡賽後玩封口，只有球會總監布達堅奴出嚟講吓嘢：「我哋唔希望餘下9場比賽，球證再有乜嘢犯錯。」
至於馬略卡主場對巴塞隆拿，巴塞有驚無險下贏2:0；美斯入一球後，又再破球會紀錄。25分鐘，美斯右路開出罰球，阿歷斯山齊士門前好似加一頭頂入；電視台原本都當呢位智利國腳先開紀錄，但及後更正，原來佢冇掂到個波，入球判番畀美斯。美斯亦以35個入球，同C朗喺西甲射手榜並駕齊驅，仲打破「大哨」朗拿度喺96/97球季所做嘅巴塞單季聯賽入球紀錄。
美斯成巴塞單季聯賽入球王
其實下半場巴塞都有啲危機㗎，中場堤亞高艾簡達拿犯手球，兩黃一紅被逐，好彩少打一人嘅巴塞，仍然靠碧基門前執雞，奠定勝局；取得第2個聯賽入球嘅碧基又做出「孖2」手勢，向女友Shakira示愛。家皇馬同巴塞保持6分距離，餘下9場比賽當然精采，C朗同美斯鬥入波又係正，總好過睇隻狼點贏隻豬啦。