最近幾隻民企因為核數師辭職或未如期完成審核工作而被洗倉，小股東以前只可以跟住沽貨，想向核數師了解發生乜事都好難，但由4月1日起，小股東可以喺每年舉行一次嘅股東會質詢核數師。有核數師朋友都話，以後去股東會要打醒十二分精神，做好準備工夫。
解畫應該知無不言
港交所（388）前年檢討企業管治守則，新條文陸續分階段喺今年1月、4月及年底前實施，其中一項關於核數師嘅新增條文4月1日實施，要求上市公司管理層要確保外聘嘅核數師出席股東會，解答審計問題。
其實核數師一向都會去啲客嘅股東會坐坐，但主要係打招呼，小股東有問題只係問管理層，無意識搵個核數師出來問，偏偏核數師最清楚啲客盤數。新守則實施後，遇到核數師對上市公司賬目畀個「保留意見」，小股東都有機會問清楚原因。
之前博士蛙（1698）同大慶乳業（1007）個核數師辭咗職，當然冇人去股東會，但公司要請個新核數師完成盤數先可以開股東會，小股東問唔到辭職嘅核數師點解辭職，都可以問新嚟嘅核數師，睇吓佢有乜發現同埋點解咁夠膽接呢單生意！
不過咁，有得問唔等於答得到，核數師係專業人士，隨時講一堆正常人聽唔明嘅技術性/專業嘢，答咗等於冇答，或者答埋啲行貨。華華認為，港交所應該喺守則寫明，核數師要知無不言，言無不盡，仲要係正常人聽得明先得。
李華華
mailto:[email protected]