周中深夜三點二十七分，一個瞓梳化方便起身睇波的晚上，手機鈴聲一響就開電視，剛好準備開波，忍不住要畀比個like自己，話醒就醒確實不是每朝都做得到的，只可惜韋斯咸又不爭氣，臨完場又被人逼和，連續4場主場都和波，下年英超暫時唔使預佢。
六點○七分，手機傳來短訊，波友說早知如此就瞓多兩粒鐘好過，我看見窗外隱約浮現的一點黃，又未必嘅，不是睇波又點會欣賞得到轉眼即逝的日出呢。
六點十五分，做完兩下甩手操，百無聊賴玩電話睇what'sapp，發現其中一個朋友那句已經250天沒有更新的status：每天進步多一點！嘩，好大壓力啫，但若果他堅持到的話，250天之後的今朝咪已經好勁？
甚麼是進步呢？在人比人比死人的競技運動裏，很容易找到答案，美斯仔射破巴塞史上入球最多的個人紀錄，是進步；泰維斯浪子回頭從新開始後備上陣，有個助攻事少，肯放低頑固認次低威也是進步。
六點四十五分，BigSam的賽後訪問，首先來一個賴人，指摘球證有兩個12碼唔畀（我竟然沒有同感），然後再來一招否認，死口唔認自己打老套高Q大腳（而我再一次不敢苟同），或許以當年保頓的打法來比，家陣的韋斯咸已經很有組織，但對奄尖聲悶的槌仔幫球迷嚟講，此刻的表現實在太保頓，好難睇！還幸BigSam最後補番一句「我仲努力學習中」，是努力尋找生機定係搵緊藉口都冇所謂，起碼比我哋知道佢都未去到恃老賣老，仲相信自己有進步空間。
早起床，幸好不用晚回家，信箱裏的一個大信封告訴我今年的半馬比以往的快了幾分鐘，正在沾沾自喜時卻又看見蔡東豪的專欄在強調成績其次，開心最緊要，笑容稍為收歛。諗番轉頭，當日在路上流汗流得很愉快，那一刻的快感，與成績無乜關係。
球迷都有個共通點，球隊是差是好，都會相信明天冇咁差，甚至會更好，周五傍晚路過全民投票站，那長長的人龍就像是降班膽的忠實fans，而我看在眼裏，卻彷彿看見了一支充滿鬥志的爭標分子。
文：keyman