天業節水（840）剛公佈業績唔錯，又有環保國策做後盾，股價同樣向下炒，睇位兜轉。天業2011年度（12月底止）成績表，純利增長咗近19%到1930萬銀人仔，業績冇問題。嚟緊日子，因應祖國水利環保國策，加埋阿爺針對扶農現代化、機械化等等政策，天業嘅農業節水系統，就食正晒國策瓣數。集團本身亦都估計，未來五年，祖國農業水利會呈現增長態勢，照計，本業應該肥仔。再講，天業終極控股係農八師國資委，喺呢期民企又嚟大插水日子，天業有咁硬淨嘅後台，有信心分。又集團現水位PB0.7倍，平過好多節水板塊。呢轉昅住天業1蚊兜轉，相信到時集團已經超賣，博上番橫行區1.25元，回報率25%，PB仲係平過好多同業。
北京發展可煲冷灶
北京發展（154）嚟緊星期一公佈2011年度業績，而集團上年出售「一卡通」嘅溢利入賬，業績應該有番睇頭。又北發阿媽係北京控股（392），又係實力派，冇有怕。至於北發本身，老實講，業務單薄咗少少，亦係等緊業務壯大機會。嚟緊日子，可塑性好高。呢轉趁業績期冷灶煲一煲，博升20%到1.73元。
錢雋