那些年睇《奪寶奇兵》嗰陣，引爆出一系列以冒險及淘金為藍本嘅故事，原來導演史匹堡話當年靈感乃嚟自比利時著名卡通片《丁丁歷險記》，如今翻拍成CG動畫，藍光碟Bonus勁Show人臉表情、CG科技等幕後製作，睇完先知人同狗都咁有戲，背後原來花費咗咁多人力物力去堆砌。
記者：陳國輝
《丁丁》原來係國寶？
深獲大導演史匹堡欣賞，全因佢係歐美等地嘅國寶級漫畫。《丁丁歷險記》始於1929年，在兒童讀物《小20世紀報》上作雙周連載，今時今日共有25套作品，更被繙譯成58種文字，總銷量達兩億冊！難怪作者艾爾吉被形容為「比利時國寶級漫畫代表人物」了。
如真人般的表情
睇完《丁丁歷險記》幕後製作花絮，相信大家會認同，拍荷李活電影等同燒錢行為，大量CG不在話下，更誇張係為求記錄埋角色嘅細微動作，竟動用逾100部攝錄機、分佈於唔同角落輔助拍攝，睇見Bonus內Studio逼爆咗大量器材，就知道鬼佬電影係幾咁認真！
有睇過《魔戒》同《阿凡達》，應該仲記得故事中嘅「咕嚕」以及潘朵拉星人，豐富又逼真嘅CG人臉表情，其實採用咗「臉部表情捕捉系統」嚟製作；《丁丁》都唔例外，戲內角色例如哈達克船長、奸鬼薩卡林，甚至乎小狗雪雪等，都變得有血有肉，唔似一些製作簡單嘅CG電影，木無表情不特止，仲假到成隻喪屍咁㖭。
英語DTS-HD最靚聲
人物皮膚、衣衫物料以及背景製作得如何逼真細緻，睇怕唔使點講；另外值得留意係音效方面，雖然Blu-ray提供咗粵語及英語兩個版本，但音色表現卻有唔同，如果只求靚聲，建議收聽英語DTS-HDMA7.1。試聲位如丁丁與哈達克駕駛電單車逃亡，以及在海上遇着狂風暴雨等情節，論方向感以及低頻表現都交足貨，播放十多分鐘，你會逐漸忘記佢係一套CG動畫。
《丁丁歷險記》
BD/$268（3D+2D孖碟裝）
