港片不死！
正當香港人對選舉失望，同時失落於合拍電影已成為華語片主流，港產片只能在影碟上懷緬的悲壯之情。許鞍華的《桃姐》給我們一個範例，以合拍名義拍出一套真正港式故事，彭浩翔的新作《春嬌與志明》，用港式雋語及幽默感來演繹發生在北京的故事，完成合拍片的大業。自言流着四成內地血的他笑言，希望藉此證明，港片的精神可以無限延伸，以《春嬌》一片為合拍電影撥亂反正。 撰文：何永寧
上映日期：3月29日
導演彭浩翔跟太太一家兩口移民式到北京生活兩年，工作室已遷往內地，香港只保留一間辦公室。彭浩翔由「煲冬瓜」式講普通話，到今日曉聽曉講，自言已經流着四成內地人的血。在北京閒時出入東方君悅大酒店的長安一號吃北京填鴨，就連早前在香港接受訪問時，隨身的助手都是地道的北京姑娘芊芊，爺前爺後的尊稱彭浩翔，很難想像他如何在新作《春嬌與志明》中，仍有能力將港片元素傾注入一部合拍片內。
不覺有文化差異
不過，彭浩翔自言跟香港沒有斷過關係：「我閒時都會去北京間利苑食飯，貪佢啲廣東菜冇咁油、睇書鍾意去國茂間PageOne，最緊要係我住喺北京幢大廈可以收到香港有線同體育台，而且喺北京撞到嘅電影人仲多過香港。」六成的港血足以讓他完成新作，一個在北京發生的港式故事，對於文化差異，彭浩翔有獨特見解：「其實好多嘢都同步，你睇iPhone、iPad都係差不多時間賣，差異呢樣唔係你想咁大，最多係兩成唔同，有八成係一樣。」
彭浩翔覺得過往香港電影人為遷就內地市場，放棄港片受歡迎元素的想法搞錯了：「過去拍合拍片嘅人，會諗內地觀眾喜歡乜，覺得佢哋唔識港式幽默，拍一啲以為內地人會受落嘅電影，最後變成四不像兩邊都照顧唔到。其實內地觀眾最想睇反而係港式電影，你睇港式茶餐廳喺北京幾受歡迎，你搞到不倫不類做乜？好多30歲左右嘅內地觀眾問我，點解家啲香港導演拍唔番以前嘅戲，一向都係睇佢哋啲戲大。」
彭浩翔的第一部合拍作品就是要還原港片的示範作，不刻意去扭曲來配合內地，他說：「唔使教育內地觀眾睇港片，就如我所講家入場大部份人都係睇呢類香港戲大。你睇外國電視劇《Friends》咪一樣好多俚語，都一樣睇得咁開心同明，嗰一、兩成睇唔明根本唔成問題。」彭浩翔的構思是將港片伸延，不局限在香港這處地方，他補充說：「想《春嬌》成為一個範例，賣嘅係港片精神，港式故事可以喺北京發生，就算我第時去第二度地方都可以拍港片，香港人、當地人都可以睇得好投入，發揮港片嘅精神。」
大街小巷搵題材
在北京兩年彭浩翔除了監製及拍攝一些網上電影外，閒時就跟編劇遊走北京大街小巷找資料及題材加入電影當中，令電影充滿港feel之餘亦不失地道的趣味，他說：「好似志明喺片中話北京天氣好乾，楊冪約志明『上床吧』，都係實實在在嘅事實，北京真係有間酒吧叫床吧，係個外國人帶我去，部戲每樣都有港式笑料同發揮，但當地人睇番都會笑。」
其實戲中不少對白都是導演跟太太的對話，彭浩翔笑說：「上次《志明與春嬌》攞金像獎，太太話個獎應該係佢嘅，因為我搬晒佢啲生活對白落春嬌度，志明多少都係我嘅投影，不過係靚仔版，導演都鍾意搵個靚仔演自己，九把刀都搵柯震東做自己。」片中客串的王馨平、鄭伊健以及當年他們的卡拉OK大熱歌《別問我是誰》和《動地驚天愛戀過》，都是不少人的集體回憶。
13日拍完低俗喜劇
港片不死，先有《桃姐》再有《春嬌與志明》，對於喝港片奶水大的彭浩翔而言，雖然轉戰內地投身合拍行列，但對港片的情意結不滅，他早前就借留港的一段空檔拍了一部地道港片，開宗名義叫《低俗喜劇》擺明漠視內地市場，彭浩翔說：「之前有投資者話想拍一部可以唔要內地市場嘅戲，我梗係答應啦，呢部係我拍戲以嚟最快又冇劇本嘅戲。」
回饋港片
《低》片用了13日就拍完，其間劇本就靠飛紙仔，上午寫下午拍火速完成，片中粗口橫飛被定性為三級電影，但彭浩翔拍得過癮，他說：「都碌埋唔少人情卡，因為有好多得意嘢明知過唔到審批，有老闆肯出錢我梗係樂意回饋港片，所以導演費收平好多，可以有啲唔同嘢喺銀幕出現係一件好事。」
余文樂再戀千嬅鬥爆肚
余文樂繼《志明與春嬌》之後，再演《春嬌與志明》時演技明顯大躍進，對此樂仔說：「從來冇懷疑過，聽到好多人講我做得好，我諗電影嘅成功，其他客串演出嘅演員功不可沒，每個角色出奇咁夾，好似戲入面楊千嬅個死檔陳逸寧講咗句粗口對白，觀眾睇得好開心，其實個演員本身唔講粗口，但佢啲對白加咗粗口搞到take咗幾十次，大家都付出好多努力。」
跟千嬅再合作，樂仔感覺比上次更有默契：「拍第一部時要好多時間熱身，到今次大家都知道春嬌同志明係乜，變得好合拍，所以有好多對白係臨時爆肚。」爆肚對白有時會包括粗口，樂仔覺得男人基本上都會講幾句粗口，自己亦沒有保護形象的包袱，所以搞爛gag講粗口不難應付，其中一句對白「粉紅色乳頭可遇不可求」就是他平時常說的一句爛gag，上集導演已想加進去，結果留到拍續集才用得上。
《春》片中雖然志明和春嬌分手兼有個新女友，但在新歡身邊又經常向舊愛發手機短訊，藕斷絲連，現實中樂仔也發生過類似情形，他坦言：「梗有，但唔係大家諗咁嘅，舊愛都有感情，只係出於慰問。」他承認以往的感情經歷中，有許多不足之處，他說：「志明最後都肯為春嬌改變，我相信每個人都願意為自己鍾意嘅人改變。我以前好鍾意喺最親嘅人面前發脾氣，發阿媽脾氣發女友脾氣，毫無保留咁佢傷到佢哋，仲覺得女友同阿媽都應該體諒我，阿媽試過嬲足我半年，佢話我性格太極端，一係冧死人唔係就hurt死人，家我學識收斂同妥協。」
難忘扮王馨平
電影中加進許多搞笑元素，除了抵死對白外，令觀眾拍爛手掌絕對是樂仔反串扮王馨平拍《別問我是誰》MV，樂仔最愛亦是這一幕：「我演得最認真係呢場，拍咗130幾個鏡頭。導演當時同我講，一個鏡頭都唔可以甩，直情要排舞咁去練每個動作。」結果連王馨平本人也覺得樂仔扮得無懈可擊。
採訪：魯萍
