呢排業績多到冇朋友，味千（538）係其中一間唐牛關注嘅。點解？因為自從「骨湯門」事件後，唐牛已經冇再幫襯呢間拉麵檔。
截至去年底，味千全年賺3.5億銀，按年減少22%，下半年只賺9466萬銀，較上半年大插水63%。全年營業額增長14.7%，但員工成本同租金支出就分別大升38.4%及25.9%，證明生意增幅唔夠Cover呢兩瓣；存貨消耗成本亦增兩成，佔生意比例達32.2%，反映原料價格正蠶食公司利潤。其他經營開支更勁升近四成，主要係骨湯門事件後，要靠大量廣告同優惠補救。
假設今年上半年盈利同去年下半年一樣，即係又有發盈警嘅可能性；至於照派特別息呢樣，相信只係用嚟息誘股東嘅伎倆，現價計息率僅1.7厘，並不吸引。味千噚日收10.58元，跌2.4%，放榜前曾由低位反彈近五成，但喺盈利前景未明，大市易跌難升下，股價可以點走？呢一刻，唐牛只想起霸王（1338）。
唐牛