一朝得志勿忘形，一時失意莫氣餒，季尾波最緊要揀到唔識停嘅球隊。今次推介，捧剛喺周中失手嘅兩級前列球隊車路士及雷丁，信佢哋聯賽升軌未破，仍在勇境，雙主W出擊！
上次英超捉正兩隊唞到最夠嘅強隊曼城同阿仙奴贏波開上盤，體力佔優係一大要素；兩軍今晚匆匆再出，唔反對上次贏到錢嘅波友再跟進，但賠率分頭大降，係唔再放上貼士榜嘅最大考慮。
曼城作客神經刀嘅史篤城，單W得1.57倍，驚畀對手嘅手榴彈戰術炸死；阿仙奴近期長買長贏，忠心擁躉笑騎騎，真係唔識個「和」字，但今爭聯賽7連勝、招呼有少少護級危機嘅維拉，主力休息不足而主W僅1.25倍，最宜博小勝開「和」。最大變數係上仗留力唔出嘅新希望阿歷士張伯倫，成個朗尼樣，忠心愚魯落場去盡，呢類球員前景先最秀麗；今返主場見復任正選，可玩有9倍嘅「首球」。
一時失意莫氣餒，英冠雷丁周二作客1:3負彼德堡，已係球會自年頭敗走卡城後最大敗仗。雷丁其實今年起勢頭極旺，成為修咸頓及韋斯咸意圖攜手直升英超嘅大患；今返已5連勝嘅主場鬥黑池，輸後賠率稍見好分有1.8倍W，最重要對手雖然位處升班附加賽區域，但近績似有見底回落之勢，最可悲係周三仲要靠38歲老牌射手菲臘斯，踢足90幾分鐘補時入多粒追平李城3:3，乜力都出晒，唞兩天又要南下，體力能否回復，小弟極有懷疑；嫌單W唔夠肉食，[-1]可再加一注。
唔使咁灰嘅仲有車仔，周中作客曼城僅敗嘅表現比小弟預期好得多；今次藍戰士又係輸完返主場對倫敦鄰會熱刺，後者一個月前反輸畀阿仙奴後散咗，班波有老態，打極都係一個加里夫巴利，喺大家各有下周二盃賽後顧下，我信車仔無論人腳調動同士氣俱勝對手，單W外，小勝開「和」作冷選。
季尾講況（form）講戰意，但昆士柏隊長祖爾巴頓喺周中比賽中段被換走俾球迷勁噓後，球會隨即神奇反勝利記3:2，好；佢之後死拗喺社交網站話：「狀態只一時，級數是永遠。」（"Formistemporary,classispermanent."）又睇吓呢位自恃質優嘅隊長今帶隊北上新特蘭，有冇貨交。小弟最唔欣賞呢類人，昆軍仲有冇咁好運？
下次見報(27/3)
蘋果波神
今日重心推介
熱選
雷丁勝(1.8)
冷選
車路士和[-1](3.6)