渴望捧銀盃、渴望睇好波、渴望睇裸跑、睇辣妹、睇奇裝異服，睇乜都好，今日在香港大球場開波的國際七人欖球賽，肯定是最能滿足各種渴望的體壇盛事。今年七欖紀念品商Kukri破天荒與GoodsofDesire（G.O.D.住好啲）crossover，渴望穿上與眾不同的鬼馬欖球服飾？這就是了。記者/攝影：徐嘉華Model：金志豪、麥姬
一條孖煙囪，重要部位上寫上「長」字配橫排「住好啲」字款，搞鬼得來令人想入非非；這是Kukri及「住好啲」一齊「腦震盪」得來。有份參與設計的金志豪（AdamRaby）及崔峻銘（Eugene），前者去年還是香港七欖隊代表，今年已去了Kukri當公關，後者是G.O.D.設計師。兩人將大球場親身經歷放入產品內，令它們變得十分香港、十分七欖、十分搞鬼。
斗篷陪睇波
這件斗篷雨衣上的圖案，最能反映每年七欖人山人海的盛況，而紅衞兵打扮亦是G.O.D.的中國香港風特色，Eugene說：「斗篷idea是我們見人們落雨時，總會用報紙遮風擋雨，這件斗篷最得意地方是每當舉起雙手，上面的人頭畫就呈現一大班人睇波的圖案。」
「長」內褲搞鬼
七欖球迷經常不惜工本cosplay入場，今年更可能像超人般內褲當面褲！因「住好啲」將Kukri個「長」字logo用到盡，推出了男裝內褲，更將logo擺正中央，「好長」字樣睇到都即時笑死。G.O.D.創辦人之一兼設計師楊志超說：「幸好Kukri好玩得，這些內褲是欖球產品中最好賣的。」
中式日曆Tee
外籍球迷最愛中國風，今次男裝Tee背後，就印上中國日曆型的「號碼」，「25」是今年七欖的決賽日，下面寫上「忌踢足球、宜打欖球」等。女裝Tee衫領斜開，甚有「馬姐」feel；其他如12生肖Tee，都加入不少中國元素。
反通脹，今次產品如手鈪及上紋身手袖等，都不用100蚊就有交易，大會更將部份金錢捐作慈善用途，一舉兩得。