相識滿天下的洪天明和周家蔚，昨日在W酒店舉行第二場婚宴，以二人最愛的豹紋作佈置，主要邀請好友出席，家蔚更喊唔停。天明為做個有膊頭的好男人，前日仍到澳門努力搵銀，未能跟老婆仔洞房花燭，天明笑說：「呢啲嘢唔使擇日，幾時再嚟都OK。」洪金寶則恨抱孫恨到出面，直言要家蔚有咁多生咁多，十二生肖無任歡迎。
洪天明和周家蔚先後在大前晚和昨日於W酒店舉行兩場婚宴，大前晚主要邀請親戚及洪金寶多年的好友，包括成龍、劉德華、張學友和鄺美雲等貴賓，場面星光熠熠。而天明和家蔚圈中人緣極佳，昨日邀請近800位賓客舉行派對，並由湯盈盈、唐詩詠、梁靖琪和姚樂怡等28人組成龐大姊妹團，與13位兄弟，包括天明胞弟天照、天祥、好友錢嘉樂、方力申、謝天華和唐文龍等玩一對新人，昨日會場以天明和家蔚最愛的豹紋作佈置，現場還有band助興。
洞房夜瞓着咗
昨日4時半，一對新人會見傳媒，榮升洪太的家蔚穿上金黑色晚裝，神采飛揚，她接受訪問時喊唔停，她透露已在酒店休息了40小時，被問到婚宴後有沒有洞房？天明搶答：「我返到去瞓着咗，其實呢啲嘢唔使擇日，幾時再嚟都OK。不過今晚都應該唔得，聽日又要做嘢，遺憾唔可以太盡興。」他們表示今晚婚宴主題是「被人玩」，兄弟團早已自備解酒丸，家蔚踢爆說：「唐文龍帶咗40粒解酒丸畀班兄弟，預每人3粒半。」
天明透露大前晚父親洪金寶最開心，行動比平時快，他笑說：「爹哋通常慢慢行，唔知係咪扮大佬啦，但嗰晚走嚟走去，好耐冇見佢咁大動作。」家蔚大讚老爺好細心，她說：「老爺噚日專登買豹紋卷蛋畀我哋食，今日又有餃子，畀我邊化妝邊食。」
當晚天明的親母曹恩玉、繼母高麗虹與洪金寶在台上影了一張極具紀念性的全家福，但有指兩位奶奶同枱冇偈傾，天明解釋：「呢個時候都好正常，爹哋同媽咪離咗婚唔係成日見，但相處唔會面左左，做仔女孝順父母就得。」他透露媽咪最錫新抱仔，他說：「每次同佢傾電話，媽咪實問家蔚點呀？從來唔掛住我。」
洪金寶恨抱孫
新老爺洪金寶昨日一早到場打點，太太高麗虹則在傍晚時分才到，洪金寶在現場中氣十足，表示好滿意這位新抱，希望可以快點抱孫，他說：「梗係想快，但由佢哋決定，仔女都得，冇所謂。」是否最想要龍B？他笑說：「幾時都得，十二生肖以內就得，越多越好，我都有三仔一女。」對於前妻與高麗虹冇交流，他說：「有打招呼，但一個講廣東話，一個講韓文，傾乜？但冇芥蒂，又唔係噚日分開，分咗幾十年啦。」晚上賓客陸續到來，包括郭可盈、張馨予、郭富城、商天娥和阮兆祥等，懷有身孕的文頌嫻單拖現身，王敏德亦與曾跟薛凱琪傳緋聞的威尼斯人高層一同到場。
新郎抽空開工
另外，天明前晚到澳門為行李箱Rimowa活動做嘉賓，今日也要開工拍戲，老婆也火速復工。天明談到大前晚的婚禮時開心說：「家蔚玩到好攰，好釋放，我飲多兩杯，最後都冧咗，我有啲渣，一上台講嘢就喊。遺憾係幾個好朋友都嚟唔到（指昨晚派對），霆鋒、吳彥祖、鄭嘉穎都唔得。」之前有傳家蔚有喜，天明說：「努力中，未有消息。」
採訪：卓寶花、林嘉慈
攝影：黃偉雄