近年幫無綫主持音樂節目嘅石修囝囝陳宇琛（石仔），噚日同老竇分別揸車出街，喺下晝四點幾去到九龍城宋皇臺遊樂場對開時，石仔前面一架警察私家車因交通情況突然收慢，石仔收掣不及撞向警車車尾，警車上兩位警員受輕傷，事後要送院治理，石仔就冇受傷。
煞唔切車
現年32歲、頭戴鴨舌帽嘅石仔撞車後頭耷耷接受現場警員嘅查問，又要接受吹波仔酒精測試，結果係零度。馮仁昭噚日打畀石仔，佢話：「我唔知點解會發生呢次意外，我其實開得好慢，但突然煞唔切車撞向前面嘅警車。」事後石仔立即被警員查問，佢非常合作，石仔話：「我冇飲酒又冇食藥，警員例行登記咗我嘅資料，佢哋又影咗相同度位，仲話遲啲要我再去落口供。」現場仲出現石仔阿爸石修，石仔話：「係呀，我哋兩父子約咗出去，老竇架車跟住我後面，佢見到我發生意外都立即停車上嚟睇吓。」
石仔自問一向駕駛都好安全，呢次純屬意外，佢話：「我平時紀錄良好，好少扣分。」石仔又話自己冇受傷，覺得非常好彩，不過經過呢次教訓，佢話揸車要再打醒十二分精神。