堪稱四十年經典嘅《星球大戰》，全球Fans斷以千萬計，電影製作核心之地佐治魯卡斯工作室，絕對係影迷比瓦努阿圖更想去嘅地方！今番受微軟之邀，遠赴美國參觀《星戰》總壇外，仲率先試玩Xbox四月大作《KinectStarWars》。打機毋須手掣，實現隔空取物嘅原力（Force）夢想，現場仲有戲中惡過鬼嘅黑白無常陪跳舞，又幾盞鬼喎。
記者、攝影：韓繼聰
鳴謝：MicrosoftHK
直闖一億天行者牧場
未出發前，先睇行程表已經有啲頭，完全唔明Skywalker、牧場、音效室，三樣嘢究竟有乜關係。帶着五分期待、五分疑惑，由三藩市市中心出發，旅遊車駛過壯麗的金門大橋，在接近兩小時車程中，和身旁帶隊的黑人肥仔Kumar傾開先知，原來目的地SkywalkerRanch（天行者牧場），就係《星戰》導演佐治魯卡斯嘅其中一個工作室，位置偏遠，沿路亦唔會有相關路標，更唔會隨便對外開放，對成為首個踏足《星戰》重地嘅港人，絕對係一份榮幸！
終於嚟到呢個佔地約19平方公里嘅SkywalkerRanch，外圍又真係似足牧場，有山有水有埋牛散步，完全唔覺有電影製作嘅設施，原來呢個工作「室」，足足花咗超過一億港元嚟興建！
光劍聲震撼心弦
三十多個來自世界各地嘅記者齊齊進場，令寧靜嘅農場忽然熱鬧。被編入亞洲組別嘅我，同南韓及新加坡記者率先進場，參觀Xbox360將推出的新遊戲《KinectStarWars》嘅特技音效。
沿途除覺得工作室環境極舒服之外，走廊更放滿歷代不同電影的海報，相信都係呢間工作室嘅「戰績」。進入其中一間房，三位音效製作人員正埋頭苦幹，見我哋嚟到，即簡單講解遊戲嘅音效製作過程。據佢哋所講，《KinectStarWars》入面嘅音效，大多根據電影原版製作，好似經典嘅激光槍「蕉蕉聲」，同埋揮動光劍嘅「嗡嗡聲」，務求讓玩家感受到電影般嘅質感同震撼！他們更即席示範製作一段揮劍格鬥嘅片段，音效固之然正，但更吸引我嘅係遊戲開發畫面，令我更期待遊戲嘅真身。
黑武士紆尊迎接
經過上午嘅牧場郊遊熱身，返到座落金門橋Presidio國家公園嘅LucasArts總部，正式踩入《星戰》總壇。總壇即係總壇，果然有氣勢，竟然派嚟終極首領黑武士同白兵出迎，一眾記者即時撲前狂合照，出盡鬼馬動作加表情，當正自己有份拍《星戰》一樣，個個玩到唔捨得走。
入到小型劇院跟製作人訪談，Xbox360創作總監KudoTsunoda同LucasArts製作人CraigDerrick，跟記者大談《KinectStarWars》嘅創作過程，講解遊戲有幾多創新過癮點子。「Kinect毋須傳統手掣操控，令我哋可以實現星戰迷體驗『原力』嘅夢想。」傾咗大半個鐘，終於轉場試Game，黑武士、白兵同R2-D2一直喺門外默默等待，再陪我哋轉場去試Game，真係殷勤過酒樓知客。
實現原力夢想
終於嚟到今趟美國之旅嘅戲肉，試Game場地原來喺員工嘅康樂大樓，途經嘅精品店比SkywalkerRanch更大，一個維修機械人揸住衣架賣T-Shirt，勁趣怪！我都忍唔住要買番件。
現場設有總共六套Xbox360加大電視，落地玻璃眺望三藩市最具歷史建築特色嘅「PalaceofFineArts」，靚景在前，仲有美食同紅酒，呢個試Game會認真豪氣。
《KinectStarWars》要到四月頭先發售，但現場試玩版本已經好足料，模式又多畫面又靚，憑空揮劍殺敵之餘，仲可運用「原力」移動物件，個個伸出左手，正經八百咁扮出「原力」，仲要不時彎身前衝、閃避、跳躍等動作，玩完又攰又口渴，竟慣性地伸手，妄想用「原力」攞罐汽水嚟飲，證明隻Game的確令人相當投入。
帝國反擊戰
玩玩吓連黑武士同白兵都落場做串星，跟記者們大玩「跳舞模式」，但見「黑白無常」難得放下威武身段，極度投入跟記者一齊跳，兼且擺出騎呢姿勢，我呢個《星戰》迷，嗰一刻唔知好嬲定好笑。
自問無乜跳舞天份，索性轉玩其他模式，同白兵鍊番轉「Podracing」未來賽車。實試過後，發現遊戲立體感做得好有層次，使用各式武器、增壓加速等都令遊戲充滿刺激，儘管白兵受裝甲所影響，但駕駛技術依然高超，劈彎、飄移乜都識，對我呢位賓客毫無保留，令我聯想帝國壞人們出力還擊嘅情節，嗰一刻真係想用原力轟佢出街！
限量版Xbox360曝光
最攞星戰迷命嘅，就係呢套限量版Xbox360連Kinect套裝，主機外形似足R2-D2，同現場隻真實版R2-D2拍埋一齊，搶眼到爆，真係好想搶佢返香港。
香港Fans結集 RubberBand即場格劍
《星戰》迷盡全世界，微軟亦喺香港搞咗個NightParty，請嚟四個白兵，同一大堆Fans撐場，連艾粒同RubberBand六位大男孩都有到場，再加靚女丁丁一齊試玩，氣氛同氣勢不比美國Event輸蝕。
Party上只係試咗故事同Podracing模式，RubberBand就大Show劍術同運用原力，而艾粒就表演飄移技術，玩到唔停！Fans們大讚遊戲逼真，實現咗佢哋嘅「星戰夢」。故事模式後段出現嘅空戰情節，更係首次曝光，可控制X-Wing同帝國軍激戰，超爽！
RubberBand
泥鯭：「玩嘅人當然過癮，但睇嗰個同樣興奮，因為睇到佢哋投入打機時嘅有趣肢體動作。」
6號：「我都係《星戰》Fan士，不過以前啲Game要用手掣玩，今次全靠Kinect，令我可以憑感覺嚟打機，好Fantasy！」
艾粒二子
少爺占：「好開心囉！好似入咗套戲咁，令我不停想玩。」
當奴：「諗到可以用手出原力，就好想快啲玩，仲要等下個月先有Game，好難受呀！」
