三月二十三日，鍾庭耀發起嘅網上選舉正式啟動，網上投票呢回事，並不科學，只要有組織地發動五毛黨上網，特別係在一般人不以為意，不願參加投票嘅時候，懂得發動群眾之人最有利，共產黨素來識得發動群眾，故此好多年前一位著名報人就寫過：香港有選舉，左派實贏！昔日港英有意無意之間，唔敢搞議會民主選舉，或與此「共產黨最識發動群眾」意識有關。
今日嘅網上投票選特首，有冇人發動群眾呢？左丁山唔知，唔敢講，如果唐營去搞，亦多數輸在「打電腦人手不如對手」呢個關鍵。在打吡賽馬日，有人講及唐營為何在競選戰略戰術上輸得幾慘，分析到原因之一係成班香港仔女做參謀，似用MBA嗰套，首先問Wherearewe（我們在哪裏？）、Wheredowewanttobe（我們要走向那裏？）、Howdowegetthere（怎樣走到目的地？）再加埋SWOT分析，學院派到極，點知對手有北京軍方介紹認識江湖人物（劉夢熊語），有辦法進入「政府電郵系統」（見王岸然、沈旭暉文章推測），肯爛打到上街到約道派傳單（劉夢熊），可講得話係拳拳到肉，棒棒到骨，班香港仔女有乜辦法識應付吖！道理與一啲香港正當商人入大陸做生意，依足枱面規矩就會大敗而回嘅情況一樣。
今日網選，並無任何法律性、約束性，只係算大學生諗出嚟諷刺小圈子選舉嘅玩意，但目前政治局面荒謬怪誕，全港市民不如玩埋一份，一於上網投票，投俾邊個呀？呢個既然係民主派催生之遊戲，好應該投票俾何俊仁吖，何俊仁在網上高票當選特首，而在三月二十五日低票出局嘅話，必然成為有趣國際花邊新聞，讓全世界知道香港行政長官選舉之荒謬性，有利大家爭取2017年真正特首普選。如果唔投票俾何俊仁，應該投白票，以示抗議整個選舉程序。過去兩星期，支持選委投白票嘅人數日增，今日嘅網上投票結果，如白票成為大多數，可以俾不少選委一個在後日投白票嘅藉口，因為西環曾經指示佢地按民調投票吖嘛！梁振英陣營經常以民調為藉口，游說選委尊重民意，今日就係一個最好機會，齊齊上網投白票！