天后潮媽陳慧琳（Kelly）前日剖腹誕下次子小龍包，榮升哥哥的長子劉昇（蝦餃仔），昨日由鍾珍代替媽咪接放學，平時喊着返學的蝦餃仔，昨日突現大佬風範，心情靚靚向記者揮手，但因感冒咳嗽，暫時仍未能見細佬。
自從蝦餃仔劉昇上年9月開始返學，天后潮媽陳慧琳無論工作幾忙碌都好，每天都堅守母職盡量安排時間，親自接送蝦餃仔返學放學，就算臨盆前兩天，Kelly都堅持挺着大肚到學校接寶貝蝦餃仔。前日Kelly入院生產後，因為老公劉建浩（Alex）一直留在醫院照顧老婆，接送蝦餃仔職責則交給經理人鍾珍。
患感冒未能探弟
昨午未到12時，鍾珍已急不及待與Kelly的菲傭抵達學校門口等候，菲傭抱着今年7月將三歲的蝦餃仔步出學校，之前返學喊足半年的蝦餃仔，榮升為哥哥後，昨日放學突然大佬上身，望見在場近十位記者，毫不害羞地笑晒向記者揮手打招呼，又不時做出可愛表情擰來擰去、嗡鼻、嘟嘴和反白眼，精靈又可愛。
放學後蝦餃仔直接返家，沒有到醫院探望媽咪及見細佬，鍾珍解釋：「佢有少少咳唔可以去醫院，到家仲未見過細佬個樣，不過知道細佬出咗世。」做了哥哥，蝦餃仔是否佷開心？鍾珍表示他年紀還小，又未試過做哥哥及未會表達。
「Kelly可以落床」
至於昨午二時半，Kelly助手Leo探望完Kelly後說：「Kelly已經可以落床，精神好好，佢話噚晚同蝦餃仔傾咗視像電話，話媽咪好快出院返屋企，唔見媽咪、爹哋，蝦餃仔好乖，冇扭計。」Leo又透露Kelly計劃餵人奶，預計兩、三日後出院，回家後會拍全家福與大家分享喜悅。
採訪：王連連
攝影：陳順禎