諸葛紫岐（Marie）成為Neway新抱薛太才兩天，昨日已復工出席商場活動。Marie着住老公薛嘉麟送的性感長裙、戴住鑽戒現身，她謂成為人妻，感覺興奮，但暗示無斟茶給陳法拉，又無暇拆陳法拉送的禮物，不過，Marie就被發現得閒拆文詠珊的賀禮，明顯待遇不一。
諸葛紫岐周二在會展擺130圍，高調嫁給Neway細少兼主席薛嘉麟，盛傳不和的「妯娌」陳法拉都有到賀，成為全晚焦點。
Marie成為Neway新抱兩日，昨日已火速復工在又一城宣傳，她穿上老公送的性感晚裝，戴住鑽石戒指，又透露想去陽光海灘的熱帶地方度蜜月。Marie說：「好攰，不過都仲係好興奮，噚日休息咗一日，覺得新婚變化唔係太大。」現時變成薛太，習慣嗎？她說：「好感動，好開心！由早到晚都精神緊張，好開心有咁多嘉賓。」
只斟茶給長輩
問到是否一家人破冰？她即說：「唔講呢啲花邊新聞喇，最緊要開心。」奶奶有否叮囑她們和平相處？Marie即遊花園說：「佢不嬲都好錫我哋。」
有傳當晚她跪地向傳已入門的阿嫂陳法拉斟茶，Marie則暗示無此事：「老人家講平輩唔駛斟，只係斟畀老人家就得。」隨即轉口指現時多了一個稱呼：「返到屋企，老公不停咁叫我老婆，我都想快啲多埋個名媽咪，呢個係福分，生多啲都OK，我好鍾意小朋友，一家人開心啲。」
未拆法拉賀禮
陳法拉稱送了「一對嘢」給他們做賀禮，問到底是甚麼？Marie即說：「我收咗好多禮物，太多喇，都未拆，所以都唔知。」不過，無時間拆陳法拉賀禮，但昨日卻被發現拆了JaniceMan的一對酒杯，更將相片放上微博。
採訪：顏英儀
攝影：林德雄