無綫近年不少藝人離巢北上搵人仔，加上王維基的免費電視台瘋狂挖角，令無綫鬧藝員荒。已北上發展的吳啟華前晚現身，他一口否定重返無綫拍劇，更出言狂踩無綫待遇差，酬勞又奀，除非由新老闆陳國強親自邀請才會考慮。
鄧特希導演和監製的劇集《親密損友》，前晚在亞視首播，一眾有份演出的包括關楚耀、趙碩之和劉錫賢等到旺角出席啟播晚宴，有份客串醫生一角的吳啟華亦有出現。當司儀問到亞洲先生邱士峻對此劇有何期望，他竟倒米說：「我看過宣傳片，都是男罵女，女罵男，有甚麼好期待。」司儀笑言他如此直接，邱士峻才補鑊說：「我只是這樣說說而已。」
認接觸王維基
已北上發展兼娶老婆定居的吳啟華，有否想重返娘家無綫拍劇？他竟毫不客氣說：「唔會返TVB，大家都知，外人返去，唔會有特別角色做，時間又唔好，又長，酬勞又唔係特別好。」至於王維基揸弗的免費電視台，吳啟華坦言初步接觸不錯，但依然要看雙方意願和時間。
惹拐子佬驚魂
但無綫有新老闆「殼王」陳國強上場，吳啟華會否再作考慮，他笑說：「咁如果佢開聲又唔同。」現在無綫也肯加薪留人，吳啟華聞言讚好，坦言若跟以前制度未必會出錢挽留。假如無綫再開拍《妙手仁心》會否接拍？吳啟華表示：「乜劇本都冇所謂，錢先係最重要，如果有Ada（蔡少芬）就係好，我唔後生，只想做自己想做嘅嘢。」
此外提到日前帶囡囡回港，險些以為她被拐子佬拐走，吳啟華說：「我同外母帶個女返嚟搞個回鄉證，點知行行吓唔見咗佢，嗰吓真係好驚，原來係個女匿埋玩咋。」
另外在劇中趙碩之和關楚耀扮情侶，是否很多親熱戲？她說：「唔算多，少先夠珍貴。」
採訪、攝影：卓寶花
