喺南昌搭地龍過海去香港，唔使9分鐘就到，呢段時間夠你睇幾條《蘋果》動新聞；而英冠兩支球隊列斯聯同埋諾定咸森林，就喺呢短短9分鐘合力炮製5球入波。喺前晚場英冠，列斯同森林，你一球，我一球，搞到球迷好似坐過山車咁緊張；列斯以為追得番，點知最後兵敗如山倒，森林最後7:3作客狂勝兼開咗個150倍嘅「客其他」波膽。
森林踩場狂勝7:3
前晚列斯主場對森林呢場英冠，真係精采到冇朋友，你真係冇可能估到兩隊可以喺9分鐘內5球，唔知仲以為係打緊Winning㖭。講番場波，列斯開波就由辛迪加斯射入12碼領先1:0，但森林由古迪奧拿同麥奇利連入兩粒，半場反超前2:1。換邊之後，戲肉嚟喇，布力史托喺52分鐘幫森林將比數擴大至3:1；十足坐過山車嘅列斯冇放棄，喺53同55分鐘由比治奧同埋米高布朗各建一功，追成3:3平手，信心當堂番晒嚟。
不過，列斯聯只係開心咗一分鐘，森林又立即發功，喺56分鐘由麥奇利把比數改寫成4:3；之後喺60分鐘，佢完成帽子戲法，助森林領先至5:3。我求大俠數數手指，佢哋兩隊喺9分鐘合共入咗5球，有冇再誇張啲呀！咁都未夠，麥奇利喺71分鐘食出「大四喜」，加埋布力史托喺81分鐘再入多粒，最終森林作客大勝列斯7:3，仲爆埋個150倍嘅「客其他」波膽出嚟。
禾諾克：真係投晒降
查實今次唔係森林第一次作客贏對手7球，喺95年4月1日就試過喺英超作客贏錫周三7:1，家英格蘭國家隊嘅臨時領隊皮亞斯仲梅開二度㖭。森林領隊葛達利賽後就話：「我認為兩隊球員都打得好好。今場波我哋把握到入球機會，造就大勝完場。麥奇利雖然嚟自非聯賽，但佢真係好有天份，唔單止係雙槍將，仲有頭槌呢瓣，而且身體亦好強壯。」
列斯領隊禾諾克都認輸到腳震：「主場咁樣輸真係好尷尬囉，但我唔認為我哋對中堅打得好差，淨係知對手射親都入。我哋一直戰鬥到底，不過俾佢哋攻入第4球後，真係投晒降！」家列斯以54分排緊英冠第10（未計周三賽果），仲有機會殺入前6爭升班附加賽，唔知今次會唔會畀森林一鋪打沉喇！