晉佳中長線睇淡大市，講咗好幾次，但恒指短線喺250日線連續3日頂得住，有個小小反彈都唔奇，如果有揸住一兩日就有機會食糊嘅股份，試試都無妨，不過，選股要小心啲。
民企股跌勢近排用風聲鶴唳形容，實在唔夠貼切，用腥風血雨就差唔多，不過，近期都唔係全線民企股死晒，你睇死得甘嗰批，主要都係核數師辭任、延遲公佈業績、濫借股份畀人沽空嘅股份。
至於個別業績好嘅股份，只要有說服力，都可以升得好靚仔，例如BB奶粉股合生元（1112）同埋醫療股創生控股（325），後者噚日急升一成至2.80元，如果有睇佢份業績，就知道升幅絕對唔誇張。
不過，大家要留意呢篇文開頭一段──因為個市短線反彈可能短命，所以短炒快閃會穩陣啲。創生股價波幅夠大，理論上都可以出現短炒快閃嘅機會，隻股噚日即市喺2.90元有啲壓力，等佢出現輕微回吐，喺2.70至2.80元之間小注買入，博佢搶高到3元樓上，短線嚟講比較實際，又有機會避過大市下跌風險。
創生主要產銷接骨板、手術用螺釘、手術工具等產品，醫療工具可以避過藥業限價問題，政策陰霾少啲。公司啱啱公佈舊年純利升33%，至1.41億元人民幣，收入上升32%至3.85億元人民幣，其實2010年同2011年兩個年度，公司嘅收入同盈利增長都大約3成左右，表現穩定，派息前嘅去年底現金保持喺接近7億元人民幣水平。
仲要係佢肯派特別息，全年派息差唔多0.20港元，派息比率9成，股息率有7厘，相當慷慨，財務問題理應唔大。
派息慷慨盈利穩增
從表面證供睇，財務報表各項目都算合理，呢隻股可以審慎樂觀。雖然產品似乎冇山東威高（1066）咁高端，但既然做到每年收入盈利增長3成，就可以用嚟同威高比較吓。創生大家唔多信，市盈率就得12.8倍；威高個個都信，有基金落場，增長相若，扣除非經常性項目後嘅市盈率就可以達到33倍。如果博市場相信創生嘅程度高咗，股價就可以拉近同威高嘅距離，中線嘅話，呢隻都係刀仔鋸大樹嘅選擇。
晉佳
本欄逢周一、三及五刊出