37歲的洪天明昨日迎娶28歲的周家蔚過門，在圓方W酒店筵開25席舉行婚宴。一對新人不理傳統禁忌，結婚前一晚繼續一齊過，認真見少一秒都唔得。昨日周家蔚離開村屋愛巢時，全程冧笑不停，天明則承諾愛老婆一生一世，希望老婆婚後能退出娛樂圈，叠埋心水做洪太。
繼諸葛紫岐後，昨日輪到06年港姐亞軍兼最上鏡小姐周家蔚出嫁，婚禮在圓方W酒店舉行，洪天明的韓籍親母亦有到場，與前夫洪金寶一同見證兒子娶老婆。由於天明不想傳媒騷擾其家人及賓客，故昨日沒有安排與傳媒見面，註冊儀式在喜宴內舉行，一對新人感動到眼濕濕。
新娘駕車迷路求救
天明和家蔚思想前衞，沒有依足中國傳統婚禮禮節，不設出門接新娘，結婚前一晚更不避嫌見面。據悉天明為娶靚老婆，去年豪花860萬元買下將軍澳馬游塘全幢村屋，過着同居生活。昨早11時50分，周家蔚親自駕車離開愛巢，並載着三名親友先返娘家清水灣半島，放低部份物品後，再直駛去W酒店。
不過，周家蔚中途迷路，要將車子停泊在路邊致電天明求助，兜了一會才到達酒店卸貨區。素顏戴黑超的家蔚全程笑容滿臉，甫落車即禮貌向在場記者說：「早晨！」天明則一早在場等候，見二人穿上情侶豹紋波鞋，默契十足，之後家蔚由職員帶路上酒店準備，天明則負責泊車，認真體貼。
「成個人送晒畀佢」
天明昨日在電話中被問到送甚麼禮物給家蔚？他一副冧女口脗說﹕「我成個人送晒畀佢嘞！佢亦都成個人送晒畀我作回禮。」問到是否承諾愛家蔚一生一世？他認真地想了一會，嘻哈笑說：「一生一世係基本條件，唔使講嘞，做男人一定要盡自己能力對老婆好，希望打好事業基礎，令佢將來生活開開心心。」
是否意味要包養家蔚一生一世，希望她婚後退出娛樂圈專心做少奶奶？天明說：「有講過嘅，因為未來工作大部份喺內地，拍劇同有機會做導演，佢都唔想成日分開，如果鍾意咪跟住我周圍走囉，但佢又唔想。」天明表示會努力搵錢養老婆，有意投資做生意，希望能讓老婆過安穩生活。
反傳統婚前先洞房
至於一直被傳有喜的家蔚，婚前一刻依然食不停口，在微博放上酒店送的精緻甜品，問她心情如何？她在電話中甜到漏說﹕「嘆緊cupcake，好好味，好甜。」生於加拿大的家蔚儼如鬼妹仔，沒有理會中國傳統婚前不准見面的習俗，她大方承認在新居與天明過夜，她說：「你哋唔知天明喺度之嘛，家唔驚（婚前見面），好多人都係咁。」
家蔚透露晚上會斟茶給長輩，問到初歸新抱，長輩有沒有向她訓話？她笑說：「我一向好乖巧㗎！」她透露天明今日將出發去澳門工作，而家蔚休息一日後，明天再於W酒店舉行第二輪婚宴派對，邀請雙方好友，到時一對新人將會被龐大的兄弟姊妹團玩，盡興一夜。
採訪：黃曉妍、周鳳儀
攝影：羅德光、黃文成
