打吡大賽之日，科技K在沙田馬會會所五樓百駿廳設下豐富自助午餐，招待各國領事及商界、馬圈朋友，今年適逢係佢嘅科技集團創辦二十五周年，按過往習慣，科技K向每位賓客贈送一條Hermes100%絲質領呔，個個都話今年條呔特別靚，即刻戴上，左丁山一早估到，故意不打呔進場，啱晒啦。
咁多商界人士在場，望落去認得嘅選委都數得出好幾位，但有時記憶失靈，記錯咗前高官S係選委，問佢對投票有何高見，佢立即話：「我唔係選委，樂得耳根清靜！」哈，馬主W就係選委嘞，冇記錯，於是問佢點樣，馬主W直認不諱：「西環有人打電話俾指示，叫我按照民調投票喎！」邊個民調呀，有好幾個噃，馬主W諗咗一陣：「鍾庭耀啩！」
哦，鍾庭耀俾中聯辦郝鐵川罵得半死，又被文匯報猛烈批判，點知原來罵之即愛之，在西環思維中，鍾庭耀民調相等於全民投票，一人一票，選委只能按照鍾庭耀民調投票，情況好似美國ElectoralCollege代表一定要依照選民意願投票選總統一樣。可惜吖，人地係真正一人一票選總統呢，我地香港就靠一個五百人樣本選特首？鍾庭耀發夢都諗唔到佢肩負如此重大責任，咦，佢嘅寫字樓亦在西環噃。
假如西環指示是真的，有人會好驚啫。梁振英民望正在下滑，支持投白票嘅市民日增，假如到咗三月二十五日，啲選委機械化地依照民調投白票，咁中聯辦內咪有人頭落地？呢場小圈子選舉愈來愈荒謬，主要原因係（依照沈旭輝一萬字長文分析）有人破壞選董、選曾時之遊戲規則，唐後知後覺，按董、曾當選之制度處事，吃了大虧，在最後階段先識得還手，於是乜嘢規矩都冇晒，特首選舉變成鬧劇一場。
大賽後次日早上在公司睇now「時事全方位」，人大代表王敏剛大罵唐英年，罪狀係與泛民搞「同盟」，佢話中國不行西方民主制，邊個在香港搞，幾乎等同勾結外國勢力，唐英年膽敢講23條就觸犯大忌。挺梁大將劉夢熊話如果呢次流選，要在香港搞特首直選，罵唐人大王敏剛話中國唔搞，香港不能搞，呢個世界真係歪理道理難分，大口人話事。