喺香港，精於煮食嘅女仔唔超過五成，仲要加埋靚女兼多才多藝，相信遇到佢嘅機會率極低。前新聞主播Winnie一副標緻可人靚樣，下廚功夫極到家，更一手一腳搞電子書《女生初下廚必學魔法》，影、煮、編、寫一腳踢，親身示範煮嘢食同出書有幾Easy，為一眾姊妹擺脫「地獄廚神」污名！
記者：韓繼聰
攝影：劉永發
Baby出世感動到喊
問到Winnie點解以煮食為題材，原來都有段故。「其實最先有諗過寫採訪奧運嘅經歷，但過咗太耐冇乜Feel。後來諗到自己入廚咁多年，身邊又有好多朋友被人揶揄『地獄廚神』，於是就希望出本書，同姊妹們分享吓煮嘢心得。」除咗幫女生「破地獄」，Winnie亦都不忍見男生成日硬哽外賣之苦。你話喇，如果多幾個呢類人靚心地好嘅女神，香港怨氣肯定大幅減少。
雖說出電子書較簡單，但其實所花心思都唔少，「喺平板電腦見到自己個Baby出世嗰吓，真係感動到喊咗出嚟！」Winnie話佢本書其實仲會Update，今個星期會有埋Video睇㖭，電子書就係有呢度好。
自砌電子書四部曲
自己影埋相
「煮飯同出電子書其實唔難，一個人都搞得掂，先諗吓想寫或煮啲乜，然後再好好預備材料。」Winnie提醒，寫書題材未必一次過「嘔」到出嚟，需平日多留意同記低有用資料。
其次就係影相，因為電子書毋須印刷，對相片要求唔高，基本上清清晰晰已過關，Winnie就包辦埋全書相片。「我要影好多煮食步驟嘅相，起初一邊影一邊煮，好論盡，搞到碟餸燶晒！」Winnie伸伸舌頭裝着鬼臉。講真，就算真係燶晒，見到你個可愛樣，男生們一定照食可也。
有文有相，最後就要排版，「我主要負責版面Style，其他嘢就要美術朋友幫幫手了。」
《女生初下廚必學魔法》
作者：黃詠妮（WinnieWong）
查詢：光波24書網（29282277）
免費上架 踏上作家路
嘅電子書。其實只要跟足格式砌好內容，再Send去24Reader，佢哋就會有專人幫忙出版，仲完全免費，最後按約定分享收益。寫得好，分分鐘有人賞識，好似Winnie咁，《女》書出版後，即有雜誌搵佢寫專欄，成名之餘更多條財路，話唔定你都可以搖身一變成才子才女。右邊兩個都係唔錯例子，不妨參考吓。
24Reader網址： http://pc.24reader.com/contactus
作者Tony曾留學日本，勁熟日本文化。因為極愛，愛到要出書同人分享日本的各樣旅遊資訊、工作經歷、甚至奇人奇事。作者寫上癮，書本更以月刊形式出版，期期有特別主題，仲有埋發聲功能，教授相關日文用語，深受日本旅人歡迎。
作者雖然冇透露身份，但從字裏行間睇得出係一個好媽媽。同樣出於愛，呢位作者就愛佢Baby愛到出書同人分享。書中記錄咗作者由決定懷孕的掙扎，到懷胎十月嘅痛苦，再到BB出世後發生的點點滴滴，準媽媽爸爸必讀。
