近日勁多拐子佬傳言！雖然警方指暫未有確實個案，但一眾家長早已人心惶惶！我哋今日就搵嚟犯罪學家黎定基先生，講吓拐子佬點捉小朋友心理？除咗訓練細蚊仔要警惕，家長都應該留意吓自己平時係咪過份鬆懈！
記者：張文蕙
攝影：伍慶泉、潘志恆
Model：Lincoln、Haily@GME、芊諾
高危之地！
有保安 爸媽防範低
保安局連日來不斷向外澄清，截至本月十八日止，香港都未有一宗拐帶案；不過城大應用社會科學系犯罪學家黎定基認為，香港正因久未發生拐帶事件，所以家長的戒備心亦低了很多：「經常見到小朋友出街，都無拖緊父母手，其實好危險！就算係想手袋換手、只係短時間鬆開孩童的手，亦應用眼望實孩子。香港家長一向警覺性低，以為公園、商場、圖書館等都有保安，就由得小朋友周圍走，好多歹徒就係都會捉着家長呢個心理，趁機向小朋友埋手。而且家長喺呢啲場合，一般好易掛住講電話及Shopping等，由於分散了注意力，歹徒落手會變得更易！」
「歹徒會利用外表吸引的東西，如細小可愛的貓狗，玩具及食物等，細路覺得得意，自然會走埋去玩！金魚佬呢個名點得嚟？就係小朋友覺得金魚得意鍾意睇，金魚佬咪好易埋手囉！」
小朋友都有平安鐘？
「走失後30分鐘係黃金時間，錯失了會好難搵番！歹徒會整污糟小朋友、幫佢哋換衫，甚至用迷藥整暈佢。將佢哋改頭換面，警察都難找！」咁小朋友有部手機，有埋GPRS功能，會唔會搵得快啲？「手機太大部，歹徒見到會即刻關掉，咁就會馬上失效！我認為現在俾老人家用的『隨身寶』不錯，一按掣可求救，不過無論你俾小朋友用防狼器或電話，都要教佢哋平日唔好亂按，要控制小朋友驚慌時才按掣並非易事！」而隨身寶發言人指，暫未有提供小朋友的服務，如感覺市面有大需求，就會考慮增加。
其實「小朋友平安鐘」，市面上有一部小蜜蜂bphone，佢設有全球定位系統，當小朋友離開了家長自己預設的指定範圍，家長電話會即時收到提示短訊；記者曾於維園一類開揚環境作測試，並預設為50米範圍外作出警報，實地測試結果幾滿意，基本小朋友未能走出預設範圍，已能收到警告短訊。
至於防範拐子佬問題，機身仲設有一SOS按鈕，能即時發出求救短訊俾預設嘅號碼，同隨身寶功能大同小異。
忌血淋淋嚇細路
家長除要睇緊小朋友，還要加強教育不要輕信陌生人；袁靚靚仲話會教佢小朋友出腳踢壞人！始動輔導及發展中心心理輔導員冼文康指：「俾小朋友去學功夫、作防拐招數，可能反而會引起反效果！小朋友攻擊的力度能有幾大？不能擊退壞人之餘，更有機會激嬲佢。」
冼生認為家長還是做好預防較實際，例如用新聞或生活事例教小朋友幾時都要拖住大人，輕信陌生人嘅後果可以有幾嚴重：「若在街上見到兒童乞丐，家長可向小朋友講解。但本人反對用一啲過份血淋淋嘅事例，例如有啲兒童乞丐係俾人扭轉腳掌、嚴重燒傷，家長無必要作例證，因為小朋友嘅幻想空間可以無邊無際，咁好易嚇親佢哋，甚至過份不信他人。其實平日教小朋友不可貪婪，至少令佢哋明白世上係無不勞而獲呢個道理，已可加強孩子抵抗誘惑的能力了。」
藝人驚嚇Share！
我相信香港有拐子佬！試過去金魚街有個男人對住我哋笑得好詭異，仲正面行過嚟想伸手帶我個女走！
平時我會用生活事例，例如在大陸見到一啲小朋友乞丐，我會講俾佢聽，啲人胡亂掂佢，又請嘢佢食，可能想拐咗佢去乞食。
原則上不太相信香港有拐子佬，但我還是寧可信其有！
我同太太、家人同工人都會互相提醒，喺人多地方會拖緊囡囡，仲會訓練囡囡有陌生人抱走佢，要即時大叫救命！我真係每日祈禱啲拐子佬快啲俾人拉去打靶！
雖然我唔太相信香港湧現大量拐子佬，但我同太太好早已經親力親為去接囝囝返學放學，佢家已學識唔亂接受陌生人的「利誘」。
警方話咗香港暫時無一單係真嘅拐子佬事件，我雖然唔太信，但都會幾緊張！以前我喺商場公園都會由佢亂行，家真係幾時都會拖住佢，始終唔想因為唔信邪、或自己疏忽，發生一啲自己一世難過嘅事。
因為我都會同屋企人返大陸做嘢，好早已經教小朋友唔可以亂跟陌生人走，幾時都要拖住我哋。而且佢哋返學放學嘅校車，都會停喺學校裏面或家門口，所以個人不太擔心，但都會加強警惕。
a.JCshop（31022783）
b.童屋童夢（95072419）
c.長者安居協會（23388312）
d.bphone（36925828）