逃出鬼門關嘞！我求大俠講緊嘅係保頓中場梅姆巴！喺上周六對熱刺嘅英足盃8強，梅姆巴踢到41分鐘突然心臟病發，送院後情況危殆；好彩，喺周一下午佢終於喺昏迷中醒返，醒咗之後第一句說話就係要搵自己個囝囝，愛子心切！
未婚妻：讚美上主
據英國《每日鏡報》報道，梅姆巴喺昏迷中醒返之後，第一句就問：「祖舒亞呢？」祖舒亞就係佢個3歲囝囝；係佢同未婚妻珊娜嘅愛情結晶品，而珊娜亦話梅姆巴認得佢㖭！珊娜喺twitter話：「你哋大家嘅祈禱真係有效呀！多謝大家！讚美上主。」至於保頓領隊哥尼亦話，梅姆巴已經可以郁動手腳，佢今次好有可能大步檻過，順利逃出鬼門關。而去探過病嘅車路士中場艾辛亦指，梅姆巴嘅精神唔錯，仲同佢以法文同埋英文傾過偈。
喺醫院同保頓發表嘅聯合聲明中，佢哋話：「梅姆巴家唔需要依賴任何儀器，已經可以自己呼吸，亦認到親人兼能夠回答問題。不過，佢嘅情況依然好嚴重，而我哋喺深切治療部嘅醫護人員，會繼續監察同埋治療梅姆巴。」
不過，據報由於梅姆巴心臟一度停頓長達10分鐘，腦部咁長時間缺氧，未知佢嘅腦細胞有冇受損，以後有乜後遺症都未知。不過，無論如何，梅姆巴有咁嘅進展，都已經係一個喜訊。我求大俠希望佢可以繼續戰鬥，早日康復出院啦！
喺梅姆巴事件後，英超聯賽會計劃檢討佢哋嘅球員體測政策，仲會同英足總傾吓喺今次事件佢哋學到啲乜嘢，同埋有乜地方可以改善；其中一項改善方案，就係要所有球員每年都接受心臟檢查一次。所謂「防患未然」，我求大俠都贊成咁做，令呢啲唔開心嘅事再冇機會發生。