【本報訊】你有你「小圈子」選舉，我有我「四方城」投票！距離特首選舉只有五天，旺角一家「雀館」別開生面地舉辦一場48小時不分日夜的特首選舉，只要你是雀友，不論你來自「紅、黑、白」道，是苦力、sales、小販、舞女還是屋邨師奶，都可以「一人一票選特首」，投下草根階層心中的一票。當然，雀友還可以投「白票」。
記者：邱錦綉、關震海、黃江奇
「流選呀！」一擲骰子，雀友鄺先生便大聲叫起來，「最好就流選，基層嘅香港人都唔鍾意佢地（唐梁）。」原本是「梁營」的鄺生，這天拿着《爽報》晚版，在旺角彌敦道金稻聯誼會內一邊搓着麻雀一邊跟雀友討論。「我淨係知道邊個做都係衰」，鄺見到「梁振英食字狡辯」的頭條，慨嘆「梁振英咁奸，我家都唔知選邊個！」。
對於選舉爛局，鄺生「下家」梁生的陰謀論衝口而出，「我覺得係一個局，佢先捧唐英年，跟住爆佢缺失同僭建，做場戲出來，其實一早就內定咗梁振英。」四名雀友你一言我一語熱烈討論特首選情，站在一旁的聯誼會董事總經理何豐麟，拿着一叠剛印好的「選票」，呼籲雀友參加「一人一票選特首」。
「麻煩你哋將手機號碼最後四個字寫喺呢張選票度，再放入投票箱內，一號箱係梁振英，二號箱投何俊仁，三號箱投唐英年，四號箱係白票箱。」何豐麟跟雀友解釋投票方法。他說這段時間見雀友都在討論特首選舉，尤其三月十六日《特首選舉論壇》當晚，幾乎個個雀友都邊搓麻雀邊看直播，粗口和喝倒采聲滿場飛，於是想出這個「一人一票選特首」的構思。
會計師監票以示公允
「我哋啲雀友乜嘢階層人士都有，sales、的士司機、小販、退休人士、教師、運輸、公務員……紅黑白道乜嘢人都有，係社會縮影，所以投票結果可以反映到草根階層嘅聲音。」何豐麟說雀友可於周四早上九時至周六早上九時，即兩天合共四十八小時，不分日夜到雀會投票。他們會於周六當天點票，並會找來會計師監票以示公允，周日早上十時公佈結果。
何表示整個活動花費500元籌備，雀局選舉雖粗糙但真實︰「我哋冇地產霸權、冇商業、冇黨派，只有社會各界嘅聲音，係最真實嘅聲音。」他估計兩天應有八百名雀友參與投票。「我哋係一班草根階層，佢哋小圈子選舉嘅選委係社會精英，睇吓大家選出嚟嘅結果一唔一樣，如果唔一樣都唔出奇！」
