自言升呢做闊太的甄楚倩，生活繼續平民化，大前晚以殘爆師奶look現身灣仔平民商場，其11歲兒子無聊地陪阿媽修腳甲，不時撩同場幾歲大妹妹仔在商場通道追逐，阿倩為顧睇電視，懶理兒子喧嘩大叫，連自己內衣兩條帶滑落也一於少理。
甄楚倩在01年4月未婚誕下兒子，後來她自爆老公是新加坡商人，入住半山豪宅，自言過着少奶奶生活，退隱娛樂圈已多年，但未知她是否過慣平民生活，還是知慳識儉，經常被發現兩母子搭地鐵出入，連修腳甲也光顧價錢廉宜的平民商場修甲店。
懶理內衣跌帶
下月17日42歲生日的甄楚倩提早扮靚迎生日，大前晚9時，記者發現她在灣仔平民化的國泰88商場一間名為Nail88修甲店修腳甲，阿倩不施脂粉，素顏嚇人，穿上底衫般的白背心，配吊腳褲加踢拖街坊裝，並帶着已11歲大、幾乎高過她的兒子陪她扮靚。
高大健碩的兒子最初靜靜在媽咪旁邊等候，但越坐越不耐煩，先撩同場修甲的太太的幾歲女兒傾偈，兩個小朋友越玩越興奮，索性走出商場行人道你追我逐，不停喧嘩大叫大笑。
正在店內享受扮靚的阿倩，只顧睇電視播放卡拉OK，懶理兒子在公眾場合叫囂追逐，連自己兩條內衣帶滑落也置諸不理，她發現記者後，不時眼睥睥望着鏡頭，直至約9點半才帶着兒子離開，並匆匆登上的士走人。
採訪、攝影：朱志聰、李志明、黃文成
