特首曾蔭權被踢爆坐富豪遊艇由澳門回港，涉及利益輸送，但他聲稱有付相若船票錢，搞出連串風波。林海峰（Jan）日前到澳門開棟篤笑，他笑問拍檔葛民輝回程時是否坐遊艇，阿葛即抵死地表示會畀足500元，一唱一和寸盡特首。
林海峰「是但噏我好驚」棟篤笑騷澳門站，日前在威尼斯人金光綜藝館舉行，一開始Jan將老婆彭羚擺上枱大放笑彈：「啲人話聽番《小玩意》覺得係溫馨回憶，其實根本係一個慘痛經歷，即係邊有人會話『小姐，你個喪禮搞得幾好喎，等幾年我嚟再搞過，拎番你啲骨灰出嚟燒啦！』」他又抵死地說：「其實唱得最多《小玩意》嘅並唔係彭羚，而係伊莉沙伯泰萊，佢結過咁多次婚，隻歌俾佢唱到跳線咁滯啦！」
好拍擋葛民輝當晚擔任嘉賓演出「大笪地」環節，阿葛以一身唐裝衫唱出《唐山大兄》、《奀妹買菜》和《點解我鍾意你》等懷舊歌曲。之後阿葛再跟Jan合唱《死啦啲青春豆》，台上伴舞的一眾女舞蹈員即場除去旗袍，以一身超低胸舞衣示人，性感養眼。
Jan自稱被阿嬸認錯是chok王林峯：「去到馬來西亞雲頂最開心，因為我聽到有阿嬸講，自己去咗睇林峯演唱會，不過唔知點解林峯講嘢多過唱歌。然後又有個阿伯話，林峯演唱會個嘉賓係蓋鳴暉，做大戲咁點chok呢？」
草蜢勁舞踩場
Jan與阿葛又擺特首曾蔭權被踢爆坐富豪遊艇由澳門返港的醜聞，Jan對阿葛說：「一陣完騷點返香港呀？坐遊艇呀？」阿葛抵死地回應：「我會畀返500蚊㗎喇！」最後兩人再與特別嘉賓草蜢勁歌熱舞，唱出《開心鬼》、《獅子山下》等名曲，尾聲以《廣播道Fans殺人事件》作為完結。
撰文：葉雪
