金至尊主席黃英豪近排好煩心，好頭痕。大家真係唔好諗多咗，只係華華上個禮拜喺一個首映禮度撞到佢，聽聞金至尊有份贊助下個月嘅許冠傑演唱會，同場嘅商界朋友同華華反應都係一樣，「黃生，有冇飛派先？」所以推算新金王黃英豪未來呢個月將為「索飛」嘅電話而頭痕啫。
內地VIP睇騷兼睇金
新金王話，斤両十足嘅SamHui固然切合到公司嘅主題，最重要係自己都係歌神嘅粉絲，「我哋由細到大都係聽SamHui，特別係讀書嗰陣，好開心同佢合作。」雖然歌神有好多關於香港嘅金曲，但查實內地都有唔少粉絲好buy。金至尊CEO吳傑莊就搞咗個一條龍服務，「家中國有成400幾間舖，我哋會邀請VIP睇演唱會，仲可以嚟香港睇吓我哋啲舖頭買吓嘢。」真係識做生意。
近年贊助好多電視劇同演唱會嘅金至尊，都唔係個個都肯贊助㗎，新金王話電影麻煩啲，因為要切合主題，好似近排杜汶澤同江若琳套新戲，入面出現一個金記出品嘅願望瓶，個樽仲有得賣，咁物盡其用先入到圍。咁嚟緊歌神又有啲乜嘢新橋先？新金王話下回分解喎！華華嘅中環靚女朋友話要畀條好橋黃生：歌神咁鍾意豹紋，不如就整隻金豹啦，可以同某國際品牌條鑽豹鏈鬥過㖭呀。
李華華
mailto:[email protected]