繼陳慧琳、楊千嬅和郭羨妮後，前年嫁作人婦的谷祖琳（小谷）亦將加入龍媽一族，現年34歲的她昨日宣佈懷有5個月身孕。由於現時婦產科床位緊逼，小谷昨坦言獲悉懷孕後，已第一時間搶訂床位，她說：「之前睇新聞見床位有幾緊張，家終於感受到。」
現年34歲的谷祖琳，前年12月與拍拖一年的大學同學、商人劉穎恆（Andrew）拉埋天窗，並揚言婚後不設防順其自然造人，結果結婚一年多的小谷終造人成功，昨日她出席公開活動時，被叔父谷德昭（肥谷）大爆懷孕喜訊。
「比原定計劃早咗」
肥谷和小谷兩叔姪昨日上午以香港思覺失調學會公眾意識及教育基金副主席身份，在山頂出席「2012FitMindWalkathon慈善行」，肥谷胞姊谷翠麗、謝安琪、Shine和商台DJ等均有出席。肥谷在台上致辭期間，突然爆料說：「我有啲嘢要講，我就嚟做伯父定唔知乜嘢（應為叔公），小谷有咗！」令站在身旁的小谷一臉尷尬。
小谷事後接受訪問時笑說：「冇諗過肥谷喺台上講，佢爆我大鑊！其實我有咗5個月，我同老公有計劃生BB，但比我哋原定計劃早咗少少。」小谷昨穿上波鞋牛仔褲加外套，身形看來仍十分瘦削，完全不覺有5個月身孕，對此小谷說：「我照過，BB所有嘢正常，我冇食乜嘢補身，聽人講孕婦口味會變晒，但自己完全冇呢樣嘢，好似冇發生過咁。」
「老公話要生兩個」
近年雙非孕婦湧來港生B，導致醫院床位嚴重不足，問到小谷有否預訂床位生BB？她坦言已做準備，她說：「Book咗啦，原來真係好緊逼，醫生話一有咗就要book，如果唔係book唔到。之前睇新聞見床位有幾緊張，家終於感受到。」
問小谷腹中BB是男還是女？她說：「未知，保持神秘，仔女都冇所謂，老公話要生兩個，我會配合老公，但佢鍾意女多啲。其實開頭知道自己有咗都接受唔到，情緒起伏好大，但家好enjoy，好似大肚婆乜都大晒咁，家好期待生第二個。」問她現時有否繼續工作？她說：「嚟緊仲有間甜品店喺尖沙嘴開，我都會落去，但就唔會入廚房，怕跣腳。至於拍劇就一定唔會㗎啦，拍戲就要睇吓個角色先。」
Kay離環球問定賠償
此外，早前有報道指謝安琪（Kay）賠償400萬與環球唱片提前解約，昨日她說：「之前發咗聲明，澄清冇喺合約完前同任何一間唱片公司傾過，發聲明係避免令人誤會我人格有問題，家合約未有新進展。」是否問過提前解約要賠償多少？她說：「我有問定先，但實數幾多唔方便講，都係要睇吓邊個模式合適同負擔得起，唱片公司冇畀壓力，總之合約家繼續。」
男子組合Shine成員徐天佑和黃又南，近日因為演出黃偉文（Wyman）音樂會而再受注目，二人準備在今年8月舉行入行10周年音樂會，昨日徐天佑和黃又南表示近日為了音樂會首度合作作了一首新歌，希望邀請Wyman填詞，但他們會待至歌曲創作完成才向Wyman開口。問到8月音樂會是否因為亮相Wyman音樂會而促成？徐天佑說：「入行10年，點都會搞，係Wyman令到音樂會擴大嚟搞。」
採訪、攝影：譚倩宜
相士話：子旺財女旺母
1977年出世，肖蛇的谷祖琳現時懷有5個身孕，她未有透露腹中B的性別。堪輿學家區仲德表示，小谷命格中有一粒仔星及兩粒女星，故她未來會有一子兩女，區仲德說：「如果佢喺新曆8月7號之前生，生仔嘅機會就大啲，應該有8成係生仔。8月7號之後生，就好大機會生女啦。」
區仲德指小谷若生仔的話，其兒子的命格比較旺財，將來多數是做生意，或是擔任公司中的一些高職位要員。但假若她生女的話，女兒的命格就比較適合從事娛樂圈，而且於電影界會有成就，區仲德說：「小谷生女嘅話，喺未來兩三年，會令小谷喺電影界會成績好啲，因為女旺佢。」