今屆港姐季軍許亦妮嘅媽媽日前喺東莞被扑頭黨打劫，許亦妮就喺微博話：「希望我媽媽的頭部早日康復。搶我媽手袋的朋友，我知道你只是求財，不是求命，幹嗎要扑我媽媽的頭？你知道生命如何寶貴嗎？
今天你發了財，但換上了別人的命。何不自己努力去賺錢呢？希望你早日醒悟，不要再四處傷害無辜的人。」但有網友睇完就留言：「這種事有炒作必要嗎？漠視生命的只是賊人，請不要將罪名放在全部內地人身上。內地太危險了，不適合香港小姐和家人去，呆在家中便算。」許亦妮即刻澄清話：「我一直說可惡的是那位傷害我媽媽的賊人。大家請不要對號入座吧！我們中國的同胞都很好。事情已發生了，只好用寬恕的心來看待事情。」
母親已返港
噚日許亦妮同港姐亞軍朱希敏出席喺西貢舉行嘅植樹活動，講到媽媽嘅情況，許亦妮話：「媽咪返咗香港，家喺屋企休息，不過怕個頭有瘀血，要再做檢查。」
問許亦妮會唔會叫媽媽少啲北上，佢話：「都會，但係做生意好難講。」許亦妮仲話自己都有陪媽咪去。
