特首候選人出席傳媒選舉論壇，唐英年與梁振英互劈，一啲都唔客氣，梁振英嘲笑唐英年返工望天花板，睇住張梳化，十分低趣味，唐英年後來爆內幕，指梁振英曾講過將商台續牌縮短至三年，及講過可能出動防暴警察對付反二十三條嘅示威者。梁振英指唐英年揑造事實，全部否認，梁振英指：「我在行政會議講乜嘢都有紀錄。」次日，李國章（前教育局長）陪梁振英見記者，聲稱：「行政會議與議員發言，無記名紀錄，只紀錄通過之議案。」李國章素來老實，即係話梁振英在辯論之前，隨口亂噏。究竟梁振英有冇講過出動防暴隊，立法會議員有責任去追查，唔好坐響度等加人工。
關於商台續牌年期，梁振英又係否認。辯論會當晚，民主黨單仲偕對記者講，佢記得03年時唐英年同佢講過話梁振英建議只俾商台續牌三年，但唐英年（工商科技局局長）爭取商台續牌十二年。呢兩單2003年嘅事，離今不遠，記者要查番舊資料，應冇乜難度。上星期六下午，梁振英見記者否認唐英年指控之後，有朋友傳給左丁山一篇蘋果李八方舊稿（2003年6月19日），「梁振英獻計，老董擬電台風雲」，內有云：
「鄭經翰封咪事件表面係茶杯風波，但官府好緊張，因為呢個『小風波』，可能會破壞佢哋個電台風雲大計劃。
香港有三個電台，港台係官台，但一直頂心頂肺；商台更加唔畀面，批評政府不遺餘力，所以好多人都想閹咗兩間『人民喉舌』。咁啱商台牌照明年到期，於是有人就向董伯獻計，希望將商台牌照期十二年縮短，例如改為三年。咁每次續牌就可以講數，不愁你唔聽話。邊個咁醒？其中一位咪梁振英先生囉。」
由此可見，梁振英建議將商台牌照縮短一事，在2003年已有人放風，不過冇乜人記得而已，當事人唐英年上星期五提出嚟講，當然有政治目的，梁振英無端端講「望梳化」，何嘗不然。究竟邊個講大話呀？
梁何唐（以候選人號碼排列）辯論之事，中大民調指梁遙遙領先，二人得分係44.2，23.4，14.3；港大民調嘅表現評分係43，23，13，梁振英大勝。民調評分與「專家評分」有巨大差別！經濟日報搵馬嶽、方志恒、鍾劍華俾分，結果係185，230，165；明報搵陶傑、張堅庭、蔡子強與黃桂林評分，分數係68、71、70.5，唐勝梁，以何最佳。南華早報搵王永平、馬嶽、潘錦泉評分，結果係51，64.5，53；有線搵葉劉淑儀、沈旭輝，邵力競評分，結果係19，24，17。綜合而言，專家學者話何俊仁勝出，梁唐難分高下，精英與民眾嘅見解，完全不同。