潘迪華前晚喺西灣河電影資料館出席電影《阿飛正傳》重映活動，佢話再睇呢套戲時再有唔同感覺。問潘迪華套戲當年票房唔理想，會唔會覺得可惜？佢話：「呢啲嘢好難講，票房唔理想同冇拍續集，唔代表套戲唔好。」至於主演嘅張國榮逝世多年，潘迪華話再睇套戲更掛住佢，佢話哥哥同新一輩藝人冇得比：「佢好識尊重長輩、又有禮貌同負責任。」