神憎鬼厭街坊投訴「坐輪椅呃人」

神憎鬼厭
街坊投訴「坐輪椅呃人」

華姐在的士界臭名遠播,鄰居大爆其生活上的「惡行」。住華姐斜對面的鍾先生指,她約兩年多前搬來,「佢邊係企唔到丫?佢嗰陣有仔女陪住搬入嚟,仲行得走得!坐輪椅呃人!」鍾說華姐平日對鄰居大都不瞅不睬,子女亦漸漸減少到安蔭邨探望她,「佢個仔初初一個星期嚟幾日,到半年前一個星期嚟一日,家基本上唔見囉!」

不愛清潔 家傳惡臭

有街坊透露,華姐不愛清潔,弄得烏煙障氣,住所宛如垃圾屋,子女屢勸不改,加上坐霸王的士怪癖令他們面目無光,故漸漸疏遠。住對面的顏氏夫婦則謂,本來對華姐並無反感,但其住所經常發出惡臭,又不肯體諒鄰居:「佢成日喺走廊拜神,熏到我哋好辛苦,同佢傾佢又擺個睬你都儍嘅態度。」
就連保安員也慘被滋擾,「佢試過叫女保安推佢上樓同幫手清潔間屋,然後同人講自己下體好痕,嚇到個女保安死!」雖然在街坊眼中,華姐行為古怪,但絕對不是患有精神病,「佢精甩尾㗎!點會係精神病,如果係就好呀,快啲請佢搬走!」《蘋果》記者