港台「自由風」節目開始前的前奏聲帶有不同的聲音，其中一把聲音似是李卓人的：「最緊要係爭取一人一票選特首」，嗌得好大聲，似聲嘶力竭，充滿憤怒與激情。泛民主派爭取2012年雙普選，由來已久，以失敗告終，中央只係應承2017年普選特首，但方法未定。
估唔到嘅係，梁振英陣營一員悍將劉夢熊，竟然會係民主鬥士，公開聲稱假如三月二十五日選委會選特首流選（即三位候選人無人得到601票）嘅話，佢會要求在五月六日重選時，以全港一人一票方式選出，並指出台灣都可以普選咯，香港人質素不比台灣人差，為甚麼不能有特首直選？
劉夢熊最近說話多多，自從在北京誇讚上海仔「功在國家，何俊仁之流望塵莫及」之後，自稱封口，點知一返到香港，就講吓人話，主張五月六日重選（假如啫）一人一票選特首。左丁山聞言大感興奮，希望所有泛民選委及專業界、商界選委本住良心，在三月二十五日全部投白票，令到無人可以得到601票，一於逼散選委會，推倒重來，等梁營民主鬥士劉夢熊上京爭取2012特首普選，爭取成功嘅話，選劉夢熊做特首我都制，以酬謝佢成為香港民主之父！
發夢冇咁早，以上只係左丁山學劉夢熊咁樣，發表連篇夢話啫，梁振英有劉夢熊咁識講嘢嘅顧問，仲駛乜要林鄭月娥？三月二十五日流選嘅機會有幾大？據呢幾日在中環聽到，愈來愈多選委假若不投唐英年一票嘅話，就會選擇投白票也不投梁振英一票，梁營要攞601票，困難重重，唯有借溫總在記者會之言，自動對號入座，散播自己已受欽點之言，希望挺梁大報誤信放風，話梁振英見李嘉誠（按：即日被李否認），壓逼選委轉軚，但北京至今未有最後拍板，溫總理之言，只係門面說話，好多選委認為作不得準，何況梁振英嘅民意調查得分與曾蔭權一樣（44對43.5），曾特首俾人鬧到暈，話佢不受市民歡迎，何解梁振英竟然係「受多數人擁護」？當選委係白癡乎？曾特首在2007年上任後有超過七成民意支持，先至真正係受多數香港人擁護嘅特首，點會諗到今天民望跌至與梁振英一齊咁低嘅唧。假如鍾庭耀問多一條：「你是否支持選委投白票？」你估支持度有幾高呢？ATV調查話有三成三人揀流選，支持梁振英者有三成五，統計上即是打和，假如選委投白票，係跟民意啫。