梅小惠的家姐是無綫金牌監製梅小青，她與丈夫劉家豪為無綫立下不少汗馬功勞，其劇集曾創下連續四年全台最高收視記錄，二人將於下周五（23日）離開TVB，下月過檔now。前晚由無綫行政主席梁乃鵬做東，率領一眾高層及被「欽點」的藝人鍾嘉欣、徐子珊、李香琴和米雪等，在中環為二人舉行歡送晚宴。
「唔會挖TVB嘅人」
梅小青表示曾獲TVB努力挽留，她說：「最開心係好多高層有留我哋，離開好唔捨得，但一定唔會挖TVB嘅人。」他們表示放假期間將與家人到杜拜旅行。梁乃鵬則歡迎二人隨時歸隊，他說：「如果外面有乜唔如意，TVB大門會為佢哋打開。」問到失掉人才，可擔心劇集質素下降？梁乃鵬說：「唔會，家多咗一批編劇，同樣會花心思製作。」有傳《名媛望族》狂飛紙仔，要劉松仁自改劇本「補鑊」，米雪說：「間中執吓會順啲，但我部《大太監》冇問題。」
歡送宴上僅得22人獲邀出席，鍾嘉欣坦言好榮幸，她說：「佢哋為我創造好多經典角色，有『常在心』同『MissKoo』，但將來合作就要睇公司安排。」她透露稍後會放一個月假返加拿大休息。
採訪：胡比
攝影：黃偉雄