又再次證明一場波最好睇的，就是問題球，尤其是可能一球定勝負的問題球，究竟入咗白界、定未入呢？究竟有手球定冇手球呢？究竟有講過定冇講過催淚彈呢？若果個個月都有特首選舉，相信應該冇乜人會再得閒睇波，睇真人表現好過，不過小朋友最好有家長陪住睇。
潮流興反勝，或者叫做反底，阿仙奴如是，車路士如是，唐唐也如是，不過前兩隊是用靚波勝出，後者則是同人鬥醜怪來博個慘勝，或者勝負已經並非當局者最關心的事，落場鬥波，越輸越多之下心知自己冇得贏，谷埋一肚氣都唔想比你贏得咁得戚。志在發洩下揭人陰私又有、兜口兜面大腳抽埋對手個頭度亦有，好多人都在怒罵那個英基小球員，但見香港地大人物亦是如此癲到嘔，試問大家又點打得小朋友落手。
要上位，自己開口只算低招，靠人哋把口讚才是上算。很多年前，當「細哨」朗拿甸奴如日中天，榮登世界足球先生之際，他接受雜誌訪問時卻說了如此一句：「我最好波？我響巴塞裏面都未係最好波！」他口中那個最好波的，今時今日你當然知道係邊個，但係5年前，美斯只不過係黃毛小子，難得「細哨」身處世界之巔，仍然可目中有人，輕描淡寫的將自己的身段放下，還記得他在每場比賽中的可愛笑容嗎？一個如此有風度的人物，你可以相信，他是真正的享受足球，而並非只為追求成就。
今時今日，風水輪流轉，「細哨」返了鄉下，美斯場場入二三四五球之時，前幾日又輪到這位阿根廷人訴心聲，在賽後他捧着那個比賽用的皮球說：「我響巴塞好重要？點都重要唔過哥迪奧拿！」言下之意就是希望恩師可以立下心腸繼續留隊，用心良苦，當那些接近神的卻表現得這麼小人物時，反而覺得他們都很巨大。
幸好特首選舉5年才一次，否則教小孩子也就越來越難了。
文：keyman