諸葛紫岐（Marie）下周二舉行婚禮，外表時髦的她將做足所有傳統儀式，新郎、Neway二少薛嘉麟將接受巴辣姊妹圍戰，準備豁出去陪玩，兩夫妻打情罵俏，薛嘉麟還笑言要振夫綱玩足老婆一世，Marie則回敬陪玩到底。
諸葛紫岐和Neway二少薛嘉麟下周二豪花百萬元，在會展補擺逾百圍婚宴招呼親友，進入倒數期的這刻，一對新人忙得不可開交。新郎薛嘉麟錫到Marie燶，明知她是麪包超人粉絲，日前特別由日本空運麪包超人汽球返港影結婚相，得新娘子笑呵呵，Marie卻表示婚禮當天不介意姊妹團大玩新郎和兄弟。
任玩不任食
Marie和薛嘉麟早前低調註冊，二人近日拍了結婚照，當中少不了新娘至愛的麪包超人，她昨日在電話中說：「老公喺日本訂番嚟，我去到影樓影相先知，佢好有我心，真係好驚喜。」據知二人下周的婚宴會場，也有不少麪包超人佈置，令Marie在充滿童真氣氛下出嫁。
Marie邀請了四名姊妹，包括老公的幼妹和呂晶晶，其餘兩位是圈外朋友，配上四名兄弟，再加一對新人，正好是十全十美的好意頭。近日不少友人向Marie提供三級意識的玩新郎招式，新娘子照單全收，她說：「我任姊妹玩新郎，不過我就唔想老公亂食嘢，特別係wasabi同鹽，怕啲嘢食咗落肚唔舒服，其他要佢着衫扮嘢，甚至考體能，我係唔反對。」
「最緊要開心」
薛嘉麟聽到將接受姊妹團大測試，有點擔心，他準備帶多點利是闖關，他抵死說：「佢（Marie）玩我一日，我玩番佢一世。」Marie聞言也搞笑說：「吓，佢當我公仔？嫁得畀佢梗陪佢玩，最緊要大家開開心心玩落去。」
採訪：比華利