今年九月開始，大學推行四年制，即是俗稱三三四，三年初中，三年高中，四年大學，在香港似是全新制度，在所有鄰近國家，其實行之已久，以後香港學制與美國加拿大日本南韓泰國歐洲等全面接軌，當然少不了中國大陸與台灣，都唔知幾好，起碼升學與交換學生並無學制上問題。懷念過去者，或者唔捨得英格蘭之五年中學兩年預科三年大學（五二三制），就送子女去英格蘭讀書囉。
四年制大學更有利於本地大學生出外交流，爭取國際經驗及視野。特首候選人梁振英曾講過佢位公子在英國讀大學曾有上述好處，在香港讀書就可能差啲嘞，唔知佢記唔記得曾經講過呢？不過梁生對佢認為有利之事，記憶力特強，其他嘢就唔會記得咁多，無謂深究咯。
香港本地大學與外國大學交換學生，交流嘅計劃多到數唔晒，以後有四年在大學，學生出外嘅機會更大，長期交換（如長至一年），短期交流（如耶魯新亞學生，短至兩星期），對學生皆有裨益。不過出外在在需財，未必個個學生都有能力支付額外費用，此則需要大學資助，大學嘅錢從何而來？UGC（教資會）撥款未必好夠用嘅啫，當然係倚賴有心人士捐款啦，香港不乏有心人，不少人士向大學捐款，專為學生出外交流、學習而設，例如商界名人、前立法局議員、馬會董事鄭明訓出版了一本書，叫做"OnEqualTerms"，論述中國在國際間之關係及地位，一定要onequalterms（平等），不能受打壓、歧視，由著名出版商JohnWiley&Sons出版，呢類書通常不會成為暢銷書，鄭先生只為有感而發，不得不發而已。佢對左丁山講過，香港與中國一定要注意培養具備國際視野嘅大學生，要送佢地出去行吓！佢坐言起行噃，老早捐咗錢俾中文大學選拔學生到夏威夷大學東西中心參加一個GlobalLeadershipProgram，為期四個月，鄭先生資助十萬港元，四個月後再資助十萬元，幫助學生參加一個GlobalInternshipProgramme，例如到聯合國實習，為期亦係四個月，可惜左丁山讀書時代，無此機會，否則一定申請。香港有錢人多，請佢地以鄭明訓先生為榜樣啦，一年捐二十萬資助學生出外，濕碎錢啫，最緊要有心為香港培養人才！