看着枱面上舊得說不出型號的諾基亞電話，再看看坐在對面的受訪者，完全不像62歲，他正是電影《桃姐》的真人版Roger，他穿上一件熨得筆直的恤衫、藍色外套、架上眼鏡，笑容可掬。入場欣賞《桃姐》時，由劉德華演的少爺仔Roger性格內歛，擔心訪問真Roger時會經常出現deadair，更擔心的是他那少爺性格。幸好出現在眼前的Roger非常健談、沒有少爺脾氣、更有點幽默，自認奄尖的他笑說桃姐離開後自己就折墮，因現在只能吃隔夜餸，無法再試到桃姐的拿手菜。 撰文：李珮洳
電影《桃姐》令葉德嫻成為四料影后，電影預購爆滿，似乎已有一段時間沒有一套成為大家話題的港產片。戲中男女主角劉德華及葉德嫻已多次接受傳媒訪問談及電影，就連監製李恩霖（Roger）亦成為熱門受訪對象。相約Roger於尖沙嘴一間餐廳見面，等候時有一男子走過來，面帶笑容問：「你哋係咪約咗我做訪問呀？我係Roger呀。」細心看他的衣着，真的和華仔戲中所穿的一樣，藍色外套、恤衫、西褲、波鞋，但不見了黑色背包，換上的是個黑色手提袋。
Roger坐下後拿出一叠桃姐的舊相，看着發黃照片的同時，他便談起與桃姐間的故事：「同桃姐最close係細個時，當時冇乜顧忌，直到19歲去完外國讀書返嚟，獨自生活咗10年，返到嚟同佢開始有隔膜。嗰時我張書枱好亂，桃姐一定會幫我執番整齊，但我係亂中有序，知道啲嘢放喺邊。嗰時我曾經同佢講『我唔需要咁企理呀！』相信當時畀到佢hardfeeling，呢個應該係我哋相處咁多年最大嘅衝突位。同埋有時佢洗到我啲衫縮水、熨衫褲條骨歪咗，我又會話佢幾句，雖然我唔係好嚴厲咁話佢，但桃姐一定好認真對待。」
一日收兩死訊
直至桃姐於2003年因中風提出入住老人院，二人的關係再接近起來，Roger說：「當時成日要返內地做嘢，但點都會一星期探佢一次，有時兩、三次，佢入咗老人院大家講嘢反而多咗，以前同一間屋住好似返酒店咁。好多時桃姐都係向我投訴啲院友、姑娘有乜唔好、啲嘢唔好食。」在老人院過了三年，Roger坦言桃姐當時的生活環境及身體狀況不太好：「佢唔想成為我負擔，因為我嫲嫲中過風，桃姐更加知道我唔會照顧到佢。我作為男人，點幫佢清潔？點協助佢去廁所？」
戲中交代桃姐病重時華仔同意醫生減藥，他隨即返內地工作，接着畫面便跳到桃姐的喪禮。現實中，事情更戲劇化，Roger帶點苦笑道來：「嗰日我早機返內地，個同事唔記得拎電腦要返屋企拎，之後我收到一個同學打嚟，話另一個同學仔腦出血突然死咗，我就開始打電話通知其他同學。跟住就收到桃姐嘅死訊，一日內收兩個死訊，搞到我好混亂、騰晒雞，又要打畀家人又要打畀同學。後來因為好大霧，原先飛北京嘅機改飛大連。我覺得係桃姐畀我嘅訊息，呢個世界好多災難，唔好對佢嘅死太傷心。」話雖如此，Roger眼中依然滲出絲絲悲傷，正如他所說：「呢份哀傷係永遠都抹唔走嘅。」
被寵慣變嘴刁
為緩和氣氛，跟Roger談到桃姐的撚手小菜，他面上即流露燦爛笑容說：「牛脷係桃姐最拿手嘅餸，我最鍾意食豉油雞同燒雞。桃姐會買隻雞自己劏，佢話返嚟先放血啲肉會好味啲，之後就掃啲蜜糖上去焗到啱啱熟，我到家都未食到好似佢整得咁好食嘅燒雞。」
由於自小被桃姐寵慣，Roger每天的晚飯都要有游水魚、一菜、一肉、一湯，他說：「呢幾味餸幾乎日日都有，我食完桃姐就食餸尾，佢煮嘢真係好好食，食到我好嘴刁。」Roger又自嘲「有咁耐風流有咁耐折墮」，以前絕不會食隔夜餸的他，現時只有隔夜餸吃，他邊擰頭邊說：「桃姐入老人院時，叫咗佢個friend陳太介紹啲朋友畀佢interview，佢想搵個人照顧我，最後搵咗個鐘點，佢每次上嚟幫我執屋，就會煮埋幾日嘅餸畀我，之後一盒盒雪入冰箱，食嘅時候就整番熱。」此時Roger又擰頭笑說：「真係折墮，做完個訪問我又返去食隔夜餸啦。」
Roger的嘴刁問題，令朋友都怕了與他外出吃飯，有時連餐廳的服務員都怕了他，他說：「我啲朋友同我出去食飯唔會再點菜，因為點乜都會俾我話。如果去高級嘅地方食嘢多數冇事，但我指出啲嘢食有乜問題，只係想講出佢哋嘅煮法有乜做錯，希望間餐廳改正，但好多人覺得我玩嘢。我覺得自己係morethen奄尖，唔係個個都頂得順。」
試褲鬧出笑話
至於衣着，原來Roger多年來只穿英國牌子DerekRose的睡衣、便服只穿法國品牌NewMan。Roger續說：「你知唔知就算同一個褲款，兩條唔同嘅褲，個褲頭都會有半吋差別。所以我去試褲，同一款有五隻色，會叫售貨員拎晒畀我逐條試。」Roger笑說有次入了試身室半小時，售貨員以為他暈了。最後問Roger對哪方面沒要求？他想了五秒說：「冇，樣樣都有要求，仲要係完美，我覺得只有桃姐頂得我順。」
場地提供：ALMOLO（海港城）