佳景集團（703）呢期冷灶變得暖暖哋，佳績期近，諗得過。佳景主打澳門餐廳食肆，由高檔到平民化路線都兼顧晒，餐廳佔地總和過10萬平方呎，係強勢領導者。佳景單係2011年半年度（6月底止），純利已經翻過一番到3200萬銀，唔好計多，全年度純利起個孖到6400萬銀，預期PE得4.8倍。仲要咁睇，澳門旅遊業，好大程度上，都係食住祖國同胞條水。再講，呢期外資大孖沙睇好澳門賭業前景，佳景主打唔係呢個瓣數，但澳門好景，佳景一樣肥仔。以受惠內需，餐飲甚至澳門地區股計，佳景呢個PE，真係平通大馬路。又佳景嚟緊星期二派成績表，有盈喜打底，交投回暖，唔好貪，博佳景翻半番到0.84元，預期PE都係7倍咋。
第一上海現金牛
第一上海（227）嚟緊星期五派全年度成績表，雖則，2011年度業績已示以盈警，但集團仍喺金融海嘯價載浮載沉，NAV折讓高達66%，殘到不得了。加埋揸住淨現金達3億銀，又係現金牛，財政靚仔。第一上海橫行底0.6元，業績日股價有乜依郁，睇住呢個位兜轉，博升20%到0.72元，NAV折讓仲係高達64%。
錢雋