黎明嫂樂基兒去年已經講明有意生B，雖然早前以貼身裙力證未有喜，但是前晚出席Moiselle春夏時裝展時，首次露口風表示現時已經冇避孕，隨時迎接小黎明來臨，相信她會與老公黎明齊齊「let'sdoit！」發力造人，同場的關心妍亦積極進補，養好身體等做媽媽。
時裝品牌Moiselle前晚於灣仔舉行春夏系列時裝展，邀得黎明嫂樂基兒、賭王千金何超盈、文詠珊（JM）、關心妍、葉蘊儀及溫碧霞等到場欣賞。
早前樂基兒透露會出席多些活動，但前晚她改口表示只是間中出席活動，笑言有人請睇騷已經好開心。
不懂食療補身
去年曾自爆有意生BB的樂基兒，被問到是否已經準備生BB時說：「算係，順其自然，冇話唔生，之前有prevent（意指避孕）但係家冇，起碼有會要囉，已經有唔同㗎喇。」問到是否想生龍B？她表示：「唔期待，冇壓力。」樂基兒又表示未有以食療補身，亦不懂得中醫方面的知識。
同場的關心妍則自爆食補品食到怕，坦言老爺奶奶及媽咪亦有催她生BB：「之前諗住演唱會之後可以努力，點知突然多咗好多工作，家日日都要錄音，始終同公司仲有約，Paco（黃柏高）又幫我搵歌，咁有誠意唔可以唔做，唯有得閒就陪多啲老公。」
超盈擬開餐廳
另外，何超盈亦現身支持Moiselle太子爺兼好友陳柏熹，她表示近日正籌備飲食生意：「好多年前喺英國食過已經好想做，類似high-tea嘅餐廳，係franchise嚟嘅，早排同媽咪飛咗去法國傾，係爹哋送畀我嘅生日禮物，呢個係長線發展，畢業後就會全程投入。」
採訪：盧妹
攝影：黃文偉
