每次蘋果有新產品推出，總成為焦點話題，新iPad今日在港開售，儘管外形無變，但憑住比舊型號高四倍解像度靚芒，仍然搶盡全球目光，就算一眾率先試玩嘅名人明星，都對新iPad嘅Retina屏幕讚口不絕，若然不需炒價買入，全部都不約而同話買硬！
記者：許福合、韓繼聰
攝影：周旭文、陳盛臣、韓繼聰
Model：ChristieYuen
iPad2跌到喊 新iPad繼續升
今日新iPad開賣，三禾電氣店長Simon試過新iPad後，評語係「勝在個靚芒，至於操作反應，就與iPad2差別不大。」由於新iPad機外形沒大分別，故大部份機殼、配件都適用於新機上，所以入定多啲新配件，承接這個iPad換機潮。
至於價格走勢，先達場iPad回收價已逐漸開始調整，Simon話16GBWi-Fi版的iPad2，回收價一個月前已屢創新低，近排更重創至$2,000左右。至於訂到首輪新iPad嘅人，若轉手最少可執$1,000至$1,500。
蘋果每次有新產品，總會掀起炒風，真正的用家往往難以買到心頭好，雖然香港今次是首賣地區之一，但估計仍難滿足用家及炒家需要，尤其未有售賣嘅國內市場，所以Simon估計16GB版炒價超過五千蚊，相信要等一段頗長時間，才有望下降至合理價位。
取代家中電腦
李純恩（旅遊飲食作家）
用迷戀嚟形容李純恩，絕不為過，由相約訪問到試玩，李生都雀躍得像一個小朋友。甫開機，即被《新蜘蛛俠》高清預告吸引：「你睇畫面清得幾誇張！真係好靚！」之後對各項功能一絲不苟地逐樣試，上網、開Apps、影相、拍片、剪片，樣樣玩勻，仲不停用新iPad為愛犬Coffee大影特影，「雖然影相唔夠我部單鏡機靚，不過質素已算大躍進，一般生活照都夠用。」
「喺《iPhoto》點點吓就執到相，仲咁鬼順，方便出外時隨時執相，以後可以減少埋電腦枱喇。」臨走時，李生對新iPad依依不捨，可惜我係做《蘋果日報》，唔係做蘋果電腦，惟有齊齊努力㩒電腦上網落柯打。
等換機計劃
趙式之（名人後代）
分別擁有iPhone同iPad2，見慣靚嘢嘅趙式之，見到新iPad仍讚嘆Retina屏幕驚艷之處，一樣吸引到佢目光。「平常會以iPad2睇新聞、電影同玩吓小遊戲，對新iPad嘅高解像畫質都好滿意。」雖然暫時對iPad2嘅工作需要及娛樂仍感滿意，不過她坦言蘋果若有換機計劃的話，必會考慮購買新iPad。
靚得過份
莊思敏（藝人）
做得靚女明星，當然對外形特別高要求。莊思敏拎起新iPad，完全無流露興奮表情。原來Jacquelin滿心以為新iPad外形會有突破。「同iPad2完全無分別囉！」咪心急，玩吓先啦。試玩一輪，莊思敏表情發生微妙變化，尤其睇完《新蜘蛛俠》高清預告片，更係兩眼發光，大讚新iPad個芒靚得過份！「開Apps開Games都好快，比iPad2更爽喎！」
方便執相
MichaelLau（設計師）
MichaelLau係大忙人，平時以iPad用作資料搜集，慣性依賴iPad在公事上的輔助，對於人見人愛的Retina屏幕，自然沒有例外。而作為設計人，新App《iPhoto》能給他不少驚喜。「《iPhoto》對於家庭式執相非常好用，多點觸控亦相當易學易用，對工作上嘅幫助會越嚟越多。」咁會否換新iPad呢？Michael唔使半秒已有肯定答案：「一定換！」
先處理舊機
陳淑莊（立法局議員）
陳議員日理萬機，新iPad上網同操作都快咗咁多，自然輕易得到佢嘅歡心。Tanya就試用自己嘅iPad1同新iPad比拼上《蘋果日報》網頁，速度簡直有如阿伯同保特賽跑一樣，令Tanya目定口呆。「日常工作我都有需要上網、修改文件、做簡報，新iPad快咁多，絕對令我工作更順暢更方便。不過舊機仲用得，買之前要諗清楚點處理，免得製造多嚿電子垃圾。」
最想玩4G
李兆富（財經專欄作家）
對IT產品有認識嘅李兆富，認為新iPad外形唔改無所謂，但比較失望的是4G版未知何時到港，感受唔到高速上網嘅快感，果然「時間就係金錢」。李兆富看過新iPad最大賣點Retina靚芒後大讚，「不單夠清夠利，連顏色顯示都相當好。稍嫌喇叭並沒大改進，若要看電影，還是配搭耳機效果最好。」
學剪旅遊短片
項明生（旅遊作家）
唔少人都知James愛旅遊同寫書，原來佢近排學埋剪片，實行用多媒體分享佢嘅旅遊經歷，《iMovie》自然成為James至愛。「一直覺得剪片要用電腦先掂，估唔到新iPad都得，仲要行得咁順，啱晒我隨時剪輯拍過嘅旅遊短片。」又搞過場、又配音樂，James高興得話買硬！
有助Fans溝通
阿占、當奴（商台DJ）
艾粒二子無時正經，試玩新iPad當然都成為佢哋發放笑彈嘅機會。艾粒先放大相中女仔嘅胸部，作勢話睇吓影相同埋個芒係咪真係咁清喎！之後仲讚新iPad功能夠勁，有助跟Fans溝通：「影相靚又可以執埋相，拍片又有防手震，又可以上網，方便我哋隨時Upload，咁我哋遍佈全世界嘅Fans就可以成日睇到我哋喇！」無嚟正經，真係畀佢哋吹脹。
