回南天，周圍煙霧瀰漫，濕濕漉漉，咁嘅氣氛，最啱日頭睇完張家輝套《大追捕》、夜晚就玩長壽驚慄大作《SilentHill》。齋睇《Downpour》氣氛營造、劇情佈局、同一貫解謎風格，新作狀態甚勇，而且地圖號稱歷代最大活動空間，逃犯主角邊走邊擺脫心魔怪物嘅追捕，實在夠晒刺激。
記者：韓繼聰
劇情氣氛水準再現
由《TheRoom》打後嘅《SilentHill》，似乎未被機迷們Like過，前作被Fans批評過多動作元素、劇情「夾硬」，所以今集就嘗試還原基本步，看重劇情之餘，亦着重有趣嘅解謎元素。
故事由《SH》漫畫編劇TomWaltz主理，講述主角身為極度重犯，卻因移送期間發生車禍而得以逃脫。以為走得甩，點知誤墮另一個可怕地獄SilentHill，主角甚至要面對自己思想、心態同背景投射而成嘅怪物。氣氛，一向係《SH》系列最大賣點，今次開發團隊就利用Unreal3遊戲引擎，打造一個上佳嘅詭異世界，將主角經常性處於昏暗無助環境，而畫面表現確比上代進步，室外濃霧環境亦造得比之前更真實，有種親臨SilentHill嘅感覺。
山頭廢鎮有排行
除劇情同畫面有顯著提升，今集《Downpour》亦強調系列中最大自由活動空間。這亦暗示耐玩度比任何一集都要高，所經歷的劇情亦更豐富。為配合更大嘅地圖，更首次加入地鐵系統，讓主角周圍去，不過唔少Fans就鬧爆呢個設定，話同《SH》荒廢風格完全唔Match。筆者其實起初都有疑惑，不過又覺得並無不妥，事關嗰架「地鐵」設計依舊有濃烈荒廢感，而且的確有助玩家喺廣大版圖上遊走，增加不少自由度。
另外，遊戲亦針對Fans嫌動作過多嘅意見，回歸頭三集「智」、「力」兼備風格。玩家須解開各種謎題同機關，先可繼續前進，Fans話終於玩番真正嘅《SilentHill》，唔使一味打怪、打怪、再打怪喎。講起打怪，《Downpour》嘅武器系統簡化咗之餘，亦更切合真實感，玩家起初手無寸鐵，只能將身邊物件當武器，如木板、鐵枝等，而玩家手上每次只可以攞一件武器，加上武器會隨戰鬥而損壞，完全貼合系列風格。試玩一輪後，發現遊戲的確唔錯，甚有當年頭三集嘅高水準，Fans們應放下成見，畀個機會隻Game，亦畀個機會自己，話唔定會重新愛上《SH》。
《SilentHill：Downpour》
平台：PS3/XB360
類型：驚慄冒險
人數：1人
售價：約$400
