近日盛傳在《東西宮略》中扮演鍾無艷的陳法拉和夏迎春的陳敏之，戲內戲外都鬥個你死我活。前晚劇中演員為《東》劇宣傳，兩位主角繼續鬥遲現身，並由法拉先勝一仗，兩人面對傳媒即扮晒老友，就連郭晉安都忍不住語帶相關寸爆兩女。
陳法拉、陳敏之、郭晉安等無綫劇集《東西宮略》演員前晚到尖沙嘴為劇集宣傳，近日法拉和敏之被傳戲內鬥到戲外，除互篤背脊外，兩人鬥度期接job又鬥遲到，前晚兩人竟有默契地姍姍來遲，敏之遲到半小時，法拉遲足40分鐘，令其他演員呆等。
送禮交足戲
法拉、敏之甫到場即醒目與安仔影合照，之後兩女又相擁以示冇不和，敏之又主動拉攏法拉影合照，並寸嘴說：「佢哋（記者）要影不和相。」她們繼續扮老友傾到雞啄唔斷，法拉預先準備一袋美容產品送給敏之，十足十上映一場上契做好姊妹的戲。
至於男主角安仔被問及不和傳聞時，他想了良久才說：「等我諗吓點答，話晒敏之喺戲中有餵我食提子，要為佢講說話，法拉真係唔啱嘞。」敏之強調與法拉度期工作前有溝通，並強調沒有不開心，私底下是老友，又撒嬌要安仔為她們申寃，但安仔卻語帶相關說：「你快啲講真嘢啦！」法拉亦夾定口供說：「我係醜婦做醜人，觀眾睇得太投入，係好事，大家係好朋友，性格好直，有話直說，所以好難話喺活動上扮friend㗎！」
此外，同場的呂慧儀穿上鬆身斗篷裝出現，孕味十足，即時惹來懷孕疑雲，不過她即急急澄清，並郁動衣服強調未有身孕。採訪、攝影：王連連