寒冬終於過去！踏入春天，處處花朵綻放令人精神大振；想丟下工作細意賞花？並非妄想！大可從家居着手！設計情報中心——陳禮善先生，帶我們走入加州花園，兩間完全唔同Feel嘅英式田園屋，欣賞吓佢點樣令屋企變得清新又Relax！
記者：張文蕙
攝影：黃子偉
Model：Waye@GME
露天浴間 玩度假
經常往返內地、經營貿易生意的戶主Ivan，不能抽太多時間與家人在一起，所以對家居要求，是多點外國風情，最好就像間度假酒店，總之一回家要感到遠離塵囂！
設計師陳禮善於是決定替他打造一個極富歐陸田園風味的家，不過Ivan初時都擔心，花花屋太女性化，話晒自己屋企，無歸屬感會好難搞！為解決此問題，全屋的亮白家具都要沒有花紋，牆紙亦唔會「花喱碌」，襯埋淡棗紅的部份牆壁及歐陸掛畫，成間屋夠晒Grand！最令人羨慕的還是二樓主人房的「戶外風呂」，深色木欄柵，高度足夠不讓人偷窺，公主浴缸配合金古典水龍頭，喺度冲凉真係乜煩惱都忘記晒！
地址：元朗加州花園
面積：2,015呎
設計連家具：$253,500
處處花海 歐陸風
另一間「花喱碌」大宅，屋主係美籍華人，佢喺美國生活多年，因為工作嚟咗香港，住慣大屋，嚟到就揀咗新界嘅獨立屋居住；雖然屋外綠野處處，不過佢仍然要自己嘅DreamHouse有更多田園氣息，而且要充滿歐陸味道。
整間屋嘅裝潢，感覺猶如花海！近廿呎高樓底，掛咗一盞約三呎高嘅水晶燈，好有氣派！客廳中間又擺放咗好多花花布藝梳化，布料全部都是從歐洲訂製，加上金黃色嘅花牆紙，視覺效果好豐富又不覺雜亂。問屋主為何如此愛花：「因為這個Feel，在外國好流行，有公主家的感覺，我們從前在美國間屋仲花呀！」
主人房設計，用咗公主睡床同花花牆紙，連櫃都有手繪圖案！而套廁則將牆身改成玻璃，想有私隱大可落下輕紗，女主人最愛就是在蒸氣按摩浴缸，足不出戶地嘆Spa！
地址：元朗加州花園
面積：2,021呎
設計連家具：$1,094,412
單位提供：設計情報中心（90948938）
服裝：GlueWedding（34890263）
香樟木衣櫃 貼心防蟲
市面雖有不少田園風味英式家具，但想搵雕工細緻兼實木造者，真係絕無僅有！Aurora負責人明小姐：「我哋有七成貨都係人手雕花，而且大部份用實木製造；市面太多得個樣嘅英式家具，內裏用料唔好，搬屋搬吓個櫃就馬上散架。」這裏的衣櫃還特選香樟木製造，有防蟲功效！而其布藝花花梳化，更全部可以拆套清洗，有啲客仲會訂多幾款，令家居隨時換裝，更有新鮮感！
改造自家！
Aurora（97823638）
地址：紅磡漆咸道北391號地舖